The Psalms 8 - Zotung Bible 2016

Pachia Phu-enaw te Ccungccaw Sung-enaw

David Hlaw

¹ Pou Bawipaw , kae Bawipaw, na min tuh laephi vawlan balyn pawcih baban mou a lesae! Na phu-enaw kha vaawlui luki khe na nung vae.

² Rhaw hae te liarutu hae kha daesah khylan, na rhaw hae keiccuze imua taraw hae te nosi hae munglae kyakhe thungnaw kha na pya hae.

³ Na kuihdung nynh a raepaw vaawlui te na tynsah hae paw sawpaw te awsi hae kha he ka do tuh,

⁴ ccungccaw hynh paw athua keiccu mou na peki? Ccungccaw maesae hung athuapaw hynh pawccemou na do-oih?

⁵ Ccungccaw hynh vaawccungccaw hae laeze ccapyh anehua lante na rae vae, sawtuanaw te phu-enaw lukhung kha na khungsah.

⁶ Na rae hae paw tungvaw a uktu lang na rae;

⁷ tuu te vaetua, te ramkaw e ramsaw,

⁸ vaawlang e pavaw hae, te rili kya-e ngasaw hae, rili lungkhu a umpaw miakaw, atyn-are balyn kha a ccu kaw kya na nung vae.

⁹ Pou Bawipaw , kae Bawipaw, na min tuh laephi vaw balyn pawcih baban alesae!