The Psalms 78 - Zotung Bible 2016

Pachia Hoynaw te Israel hae Nythya leinaw

Asaf Byarui

¹ Pou ka ccungccaw hae, ka ccangpyanaw hynh ngaetua oh; ka hopaw bya kalan hin nae nakaring kha oun tuaku tua oh.

² Tousenaw phungpaw kha ka ho cih zah, langmawlya e byakhupaw kha ka ho cih,

³ tuh-e tuh ah minpaaw hae nynh aening oun hopya hae paw, ah thae vae oh paw te ah ny vae oh paw kha nynh thua.

⁴ Tuh-e bya hae tuh ah ccaaw hae kha thuruhpya lei lan hae; Bawipaw kya-e alesaepaw ryalaw hae, a thawzung te a la cyipaw ngaeangnaw hae kha yn thua cih paw she e ccungccaw hae kya hopya lan hae.

⁵ Jakob ciihan kya phunglang kha tynsah zah, Israel hae kya upadi kha a nung, tuh-e tuh mih ccaaw hae kya ccangpya khylan ah minpaaw hae kha kaw a la pya hae paw nynh thua.

⁶ Tuhcite a pui loh lei hae paw malang she e mih ccaaw hae nynh a nyhbua cih hae, minmin tuh oun lethung cih hae zah, mih ccaaw hae kha a hopah pathy cih hae,

⁷ tuhteze nynh Pachia kha a ngaehoikuh cih hae zah, Pachia ryalaw kha ning leite a kawbya kha a zui cih hae.

⁸ Minmin tuh mih minpaaw hae te lokuh lan khyh hae, mih minpaaw hae tuh alungkhungpaw te rawse a mang hae paw phin, thinlung atyn lei hae paw phin, Pachia tungvaw lungzinaw a hoi lei hae paw nynh thua hae.

⁹ The te li a mang hae paw Efraim phin hae tuh rhawtuk nin kya vae tuh nulang a ki hae.

¹⁰ Minmin nynh Pachia byakin kha zui khyh hae, a upadi thyhte zui lan a ei hae.

¹¹ A la cyipaw te a langsapyakuh hae paw ngaeangnaw hae kha minmin nynh phe a ning hae.

¹² Izip ram, Zoan bialae kya, mih minpaaw hae muihnaw kyakhe ngaeangnaw hae kha a rae.

¹³ Rili kha thoh phiasakuh zah, minmin kha po a zuasah hae, te tui kha pang hawte a thadynsah.

¹⁴ Khuadae ccyh kya maeking te cciakhae hae zah, khuazi zidae maee awpaw te a cciakhae hae.

¹⁵ Ramkaw kya lungpi hae kha koi zah, rili kya-e tui hawkhate minmin kha a niasah hae.

¹⁶ Lungpi kyate vaw hae kha pousah zah, tui kha vawpi hae hawte a luasah hae.

¹⁷ Tuhzemah ramkaw kya Ahang Huaccepaw kha rawsete minmin nynh houh a sei ung hae.

¹⁸ A ry hae paw looh kha ngiakute mih thinlung kya Pachia kha a syntawtua hae.

¹⁹ Minmin nynh Pachia kha rawsete, “Pachia nynh ramkaw kya ccaboi kha phae kho vema?

²⁰ Tui a pou ccaw cite lungpi kha bua zah, tui tuh a pou, sanlou so yn pya kho vema? a ccungccaw hae elang saw so oun khangpah kho vema?” cite a ho hae.

²¹ Bawipaw nynh tuh-e bya he a thae te, a thin myarya ria; Jakob ciihan tungvaw maeerua zah, Israel tungvaw a thinrianaw tuh alethung,

²² pawccecize Pachia kha zyn khyh hae zah, a khumnaw huhan kha doliakuh khyh hae.

²³ Tuhzemah aning nynh ahangnaw vaawlui kha kawpya zah, vaawlang thuakaw kha a hung;

²⁴ a ae lan hae cite manna sanlou kha khuaa lang rawsah zah, vaawlang looh kha a pya hae.

²⁵ Ccungccaw hae nynh vaawccungccaw hae sanlou kha a ae hae; Pachia nynh minmin kha looh patae a pya hae.

²⁶ Vaawlui khe nithua lang e khisan kha zawsah zah, a huhan te alia lang e khisan kha a zawsah;

²⁷ saw kha vuiping hawte, azouthyapaw pavaw hae kha rili laesia zeihte khuaa lang a rawsahpya hae,

²⁸ tuh-e tuh mih ryahmin lungkhu, a umnaw hae pepan balyn khe a ccawsah.

²⁹ Tuhcite minmin a ry zeih hae te, aning nynh a pya hae keiccuze minmin nynh phe byn lan a ae hae.

³⁰ Thuasalama minmin nynh a byn maw hae, looh a ae cciamang lya hae khe,

³¹ Pachia thinrianaw tuh mih tungvaw yn ccah zah, minmin kyaze a thunghua hae paw kha theih hae zah, Israel ccangvae hae kha a khulia hae.

³² Israel hae nynh hynh-e balyn hynh a tung hae zemah a sei mamin hae; ngaeangthua lan umpaw a ryalaw hae kha minmin nynh zyn khyh hae.

³³ Tukeiccuze mih nin tuh hy hawte thangsah han zah, mih kum tuh myarya ri lan umpaw kyakhe a nung.

³⁴ Aning nynh minmin kha he a theih hae te, amaw kha a ccung hae; minmin nynh ngaesikuh hae zah Pachia kha thawte a ccung hae.

³⁵ Pachia tuh kae lungpi thua zah, kaening oun shawkhawtu Ahang Huaccepaw Pachia nynh thua cipaw oun liathui hae.

³⁶ Thuasalama mih khalang te amaw kha nawpalya lan poo hae zah, mih munglae te a ling hae.

³⁷ Mih thinlung tuh amaw kya tyn khyh; a byakinnaw kya mih lungzi khyh.

³⁸ Tuhzemah aning tuh thawccinaw a hoi, mih hoyleinaw kha ngaethya hae zah, minmin kha roh khyh hae; a thinrianaw kha atu te atu yhkuh zah, a thinrianaw balyn kha pousah leite a synku.

³⁹ Minmin tuh pynsaw sasaw thua hae zah, a zaw koute a kithui lei vae paw khisan hawte nynh athua hae cipaw a liathui.

⁴⁰ Minmin nynh amaw kha ramkaw kya atu te atu dou hae zah, laesia ram kya a ngae a thyasah hae!

⁴¹ Pachia kha atu te atu syntawtua hae zah, Israel Pachia Athyaapaw kha a thinriasah hae.

⁴² Amaw huhan kha thuasah, rhaw hae kyate a shawkhaw hae nin kha thuasah ccykekuh khyh hae;

⁴³ Izip ram kya muihsahnaw hae te Zoan bialae kya ngaeangnaw a langsapyaku hae paw kha mah phe ning hae.

⁴⁴ Mih vawkhu hae kha a nia kho khyh ccaw hae cite chiise lang a tangsah.

⁴⁵ Minmin a bou hae paw kaekih hae kha thuasah, minmin a roh hae paw buphaw hae kha thuasah a sawnua hae.

⁴⁶ Mih ccathae hae kha maccaloih hae kalan thuasah, mih ryalaw mee kha tungkhipaw hae kalan thuasah a pya hae.

⁴⁷ Mih misu ku hae kha hya te roh zah, mih eboh ku hae kha dangtui te a ro.

⁴⁸ Mih vaetua hae kha hya te theih zah, mih tuuphu hae kha ria te a chia.

⁴⁹ Mih tungvaw khe ri lan umpaw a thinrianaw, a thin-unaw, a bungpawnaw te a riathaenaw, ro a mang hae paw vaawccungccaw phu hae kha a sawnua hae.

⁵⁰ A thinrianaw kha yhku leite, mih hiinnaw kha haang khyh hae, shethya te phe chia hae.

⁵¹ Izip ram kya ccatawccaw balyn kha thuasah, Ham ccungccaw hae innbyn raveih kya-e ccatawccaw pise miakaw kha thuasah a chia hae.

⁵² Te a ccungccaw hae kha tuu hae hawte cciakhae hae zah, tuuphu hawte ramkaw kya laan a mawpya hae.

⁵³ Minmin kha khyndadyh lan cciakhae hae zah minmin tuh rih khyh hae; mih rhaw hae kha tuh rili nynh pong a vu hae.

⁵⁴ Te minmin kha a ram thyaapaw kalan khe thuasah, a ranglang kuih te a tae vae paw mua langkhe thuasah a cciakhae hae.

⁵⁵ Mih malang te minphuin hae kha a dee hae; ram kha Israel minphuin hae kalan nee hae zah, tuin kya mih bu kyakhe khua a sah hae.

⁵⁶ Tuhzemah minmin nynh Ahang Huaccepaw Pachia kha syntawtua hae zah a rawse hae. A phunglang kha zui khyh hae,

⁵⁷ mih minpaaw hae hawte maeleihkuh hae zah mih lungzi khyh; akoupaw li hawte a cceihsei hae.

⁵⁸ Minmin nynh mih khozi beiknaw hmin kha raete Pachia kha a thinriasah hae; mih zohtuh hae khate amaw kha eiungnaw a hoisah hae.

⁵⁹ Pachia nynh he a thae te, myaryamaw a thinria zah, Israel kha ccaring a vua.

⁶⁰ Aning nynh ccungccaw hae kya a la umnaw bu Shiloh khua kha a cciataw,

⁶¹ te a huhan kha rhaw hae kyngsah hae zah, a phu-enaw kha rhaw hae kuih kya a pya hae.

⁶² A ccungccaw hae kha thaloi te chisah hae zah a rho tungvaw a thinria.

⁶³ Mih ccangvae hae tuh rhawtuknaw kya chih hae zah, mih liaccaw hae elang vawpaw lanpaw lu kheit san um vae khyh.

⁶⁴ Mih ranpibawi hae tuh thaloi te chih hae zah, mih nomae hae nynh rawkhuinaw kha rae vae khyh hae.

⁶⁵ Tetuh Bawipaw tuh inaw kyate a thopaw hawte yn tho, misutui keiccuze a rawhoypaw hawte yn tho.

⁶⁶ A rhaw hae kha phe tae dadi hae zah, maethyate zungzae a nung hae.

⁶⁷ Josef ciihan kha vua zah, Efraim phin kha po khyh;

⁶⁸ Judah phin te a sungsahpaw Zion Mua kha a po.

⁶⁹ A beikinnthyaa kha ahangpaw vaawlui hawte sak zah, zungzae atyn lan a raepaw laephi hawte a sak.

⁷⁰ A ryalahtu David kha po zah, tuukhia kya-e kha a ko;

⁷¹ a ccungccaw athuapaw Jakob, amaw rho athuapaw Israel hae tuurinpaw thua khylan, a taw hae a do-oihpaw tuupinung hae a rinnaw kyakhate David kha a po.

⁷² David nynh dingnaw thinlung khate minmin kha do-oih hae zah, hawnaw kuih khate laan a mawpya hae.