The Psalms 73 - Zotung Bible 2016

UK 3 ( Sam 73—89 ) Tuaasahtu hae kyate Lue lan Ngianaw

¹ Pachia tuh Israel hae hanlan te thinlung athyaa hae paw hanlan ahoy ccaccing.

² Thuasalama kae tuh vya ka khuliakuh; vya ka thei.

³ Pawccecize ccungccaw hoylei hae paw kya-e hoirumnaw kha he ka muih tuh, a lysakuhpaw tungvaw ka eiung.

⁴ Minmin tuh ccinaw hoi khyh hae; mih pyn tuh mih ngedan zah mih ngesaw ahoy.

⁵ Ming hae hawte vawsawnaw tung khyh hae; ming hae hawte teingnaw mue khyh hae.

⁶ Tukeiccuze lysakunaw kha si lang oikuh hae zah, puathonaw kha boeining hawte a bongku hae.

⁷ Eih tho hae keiccuze mih mit tuh phang phinkhaekuh; mih thinlung tuh ngaeenaw te phe abeih.

⁸ Ming hae kha sarya hae zah ahoy leipaw bya kha a hoku hae; lysakute vawsaw pyanaw bya khate a hu a raw hae.

⁹ Vaawlang rawsenaw bya kha ho hae zah, mih lae tuh laephi vawlan a khiakuh.

¹⁰ Tukeiccuze Pachia ccungccaw hae nynh maeleihkuh hae zah, minmin kha the a hoysah hae.

¹¹ Te minmin nynh, “Pachia nynh pawtemou a nyh kho cih? Ahang Huaccepaw kya nythyanaw a um zawtou?” a ci hae.

¹² Tuhcihawpaw hae tuh ccungccaw hoylei hae paw nynh thua; hiinhoyte zungzae um hae zah, houhouh a hoirum hae.

¹³ Ka thinlung ka thyaasakuh zah, ka kuih kha seinaw hoi lei lante ka singkupaw balyn hynh alakawpaw nynh thua.

¹⁴ Anin ninlang vawsaw nae teingsah zah, awkhua takyh de nae tah.

¹⁵ Tuhcihtuhte ka la ho lanze, na ccungccaw hae kya ahme leipaw ka thua cih.

¹⁶ E hynh pawtemou thaethya lan cite he ka tua tuh, ka hanlan myarya arupaw rya nynh alo,

¹⁷ Pachia beikinnthyaa lungkhu lang ka tee koute tuh, ccungccaw hoylei hae paw mih thangnaw kha ka muih.

¹⁸ Minmin kha nawpalaepaw hmin kya na nung hae; ronaw kya na khulia hae.

¹⁹ Minmin tuh sosoh kyakhe roh hae zah, myarya lepaw rikawnaw keiccuze khaleih a zo hae.

²⁰ Minmin tuh lukhakheit nynh he a thaekuh te phe azopaw maan te nynh a loku hae; he na thaesakuh hae tuh, mih tuakunaw kha phe azo vae.

²¹ Ka lungroh zah, ka thinlung he ccih tuh,

²² baluh ka ngaee zah pawpaw mah ka tuathya vae khyh; na malang arepaw loramsaw nynh ka lo vae.

²³ Tuhzemah namaw kyakhe po ka um zah, ka ranglang kuih kha phang nae kyng.

²⁴ Tuanaw pyate laan nae mawpah zah, athangnaw kya tuh sawtuanaw te nae ccou cih.

²⁵ Vaawlang khua kya nang holeite hummou ka hoi? Namaw laelan laephi vawlan ka rypaw pawpaw mah um vae khyh.

²⁶ Ka pyn te ka thinlung tuh nyaabung hae salamah, Pachia tuh ka thinlung thawzung te ka ccoupaw ka hanpaw nynh athua zungzae.

²⁷ Nang te a sawkuh hae paw tuh a roh cih hae; na tungvaw a mesei hae paw kha na maemih hae.

²⁸ Thuasalama kae ka hanlan tuh Pachia kalan naekupaw hynh ahoy; na ryalaw balyn kha ho khylan, Bawipaw PACHIA kha ka khynnaw lang ka nungku vae.