The Psalms 7 - Zotung Bible 2016

Bawmnaw Ngiakunaw

David Hlaw

¹ Pou Bawipaw ka Pachia, namaw kya ka rekuh; yn deehuitu hae balyn kyate yn khum lah, yn luesah,

² tuhkhyhze tuh yn khum lanpaw um leite, kae kha dae yn sue cih hae, chindeih hawte kae kha zoihtatyh lan yn pae cih hae.

³ Pou Bawipaw ka Pachia, tuhcite ka cyi lanze thuasah, ka kuih kya cyiseinaw a um ze thuasah,

⁴ ka ruiban tungvaw vawsawnaw pyate ka liaru ze thuasah, ka rhawpaw kha akonglang um leite ka luade ze thuasah,

⁵ ka rhawpaw nynh yn dee sah lah, yn phah sah, ka hiinnaw hynh laephi kya yn syde sah lah, ka muisaw hynh laenoi kya yn nung sah.

⁶ Pou Bawipaw , thinriate thoku tua; ka rhaw hae thinrianaw kha rawse khylan thawzung thuatua; Pou ka Pachia, kamaw hanlan thaekuh lah, byapianaw kha raetua.

⁷ Ccungccaw zapi nynh sueluakute nang kha ae koihlu hae sah lah, ahangnaw kyate uk hae.

⁸ Bawipaw nynh ccungccaw hae kha bya a pia hae; Pou Bawipaw , ka dingnaw thyhte thuasah, ka hoynaw thyhte thuasah bya yn piatua.

⁹ Ccungccaw hoylei hae paw kya-e hoyleinaw kha thangsah lah, miding hae kha tynsah tua hae, Pou adingpaw Pachia, nang nynh tuh thinlung te tuanaw kha phe na do mamia.

¹⁰ Pachia tuh ka khawriaphua nynh thua, thinlung a ding hae paw kha a khum hae.

¹¹ Pachia tuh adingpaw byapiatu thua zah, ccungccaw hoyleipaw kha zungzae thin a rianua paw Pachia nynh thua.

¹² Lukhakheit tuh a ngaesiku khyh ze, Pachia nynh thaloi kha a tawnuakuh cih; a li kha sue zah, phang a ee;

¹³ chianawpaw a zunghe hae kha a paccynku vae, a the kha maee lang a ruasah vae.

¹⁴ Dotua oh, minmin nynh hoyleinaw kha a tuaku hae, ahoy leipaw paccynkunaw kha ccaaw lang poi hae zah, hynnaw kha ccaaw lang a saah hae.

¹⁵ Hunghua kha myarya khu lan thae hae zah, a thae hae paw hunghua lungkhu langkhe mimaw tuh a ccah hae.

¹⁶ Mih rysawthyanaw tuh mimaw lu kalan yn ki zah, mih puathonaw tuh mih lu vawlan khe accah.

¹⁷ Bawipaw tuh a dingnaw keiccuze lungtuabya ka ho cih zah, Ahang Huaccepaw Bawipaw min kha hlaw te the ka hoysah cih.