The Psalms 69 - Zotung Bible 2016

Luenaw hanlan Sawsangnaw

¹ Pou Pachia, beih yn khumtua, pawccecize tui nynh ka nging kyacia yn vu vae.

² Ccusy um leinaw akhupaw tuiccua nynh yn sungkhaekuh zah, akhupaw tui lungkhu lang ka phungkuh, tuileih nynh yn thothin.

³ Ka siaruanaw ze phe ka bang; ka lotharue phe rou vae. Ka Pachia ka dokhawnaw ze ka mit mah ngaw hoyte ka muih vae khyh.

⁴ Akonglang um leite yn hua hae paw tuh ka lu kya-e ka sangrua laeze a lunghua hae, Kae kha ro lan yn ry hae paw tuh myarya a lung hae, ahme lei lante sei yn be hae paw ka rhaw hae tuh mih thaw asae. Ka ru leipaw uccaw kha ka rung hahe cih tou?

⁵ Pou Pachia, ka ngaeenaw kha phe na ny; ka la mesei hae paw kha na kyate thuruh kho thua khyh.

⁶ Pou vaaw Bawipaw Pachia, nang ae ngaehoikuh hae paw tuh kae ka keiccuze maethyanaw mue nan hae sah; Pou Israel Pachia, nang ae ccung hae paw tuh kae ka keiccuze thethyanaw mue nan hae sah.

⁷ Nang keiccuze saryanaw ka mue zah, maethyanaw nynh ka mae phang yn bong.

⁸ Ka uno hae kya mikhiapaw lang ka tang vae zah, ka nung ccaaw hae kya ramccangpaw lang ka tang vae.

⁹ Na inn elang ka lungzuanaw nynh kae kha phe yn ae; nang ae saryatu hae paw nynh ae saryanaw hae paw bya tuh ka tungvaw accah vae.

¹⁰ Looh-ae sungnaw te ka thinlung zakaw he ka sangsakuh tuh, minmin nynh yn theihrya vae hae.

¹¹ Buriboei he ka zingkuh tuh, minmin nynh yn sarya hae.

¹² Laanluepi kya ka thethya yn ho hae zah, a zu a ae hae paw nynh hlaw yn phua hae.

¹³ Thuasalama, pou Bawipaw , kae tuh namaw kalan saw ka sang. Pou Pachia, atynpaw na sungsahnaw alepaw khate, na ccansaku ccyh khe beih yn leih. A lungzipaw na bawmnaw khate,

¹⁴ tuiccua lungkhu lang ccawnaw kyate beih yn khum; ka rhaw hae kyate thuasah, akhupaw tui kyate thuasah yn luesah.

¹⁵ Tuileih nynh ka tungvaw yn thothin nan sah, akhupaw tui lungkhu lang ka ccah nan sah, Hunghua nynh a lungkhu kya kae kha yn huthin nan sah.

¹⁶ Pou Bawipaw , atynpaw na sungsahnaw tuh ahoy keiccuze yn leihtua, myarya lepaw na thawccinaw thyhte ka kalan yn maeleihku tua.

¹⁷ Na seepaw kyate na mae kha ccanglang yn hawitaw nan, pawccecize vawsawnaw ka tung, arangte yn leihtua.

¹⁸ Ka kalan yn naekuh lah, yn shawkhawtua, ka rhaw hae kyate yn luesah tua.

¹⁹ Ka teingpaw theihryanaw, maethyanaw te thethyanaw kha phe na ny; ka rhaw hae kha phe na ny hae.

²⁰ Theihryanaw nynh ka thinlung kha phe yn koi zah, lungrote ka um. Ngaethyaumsahnaw kha ka ccungku zemah ka muihkuh khyh; ngaengansahtu hae kha ka ccungku zemah ka muihkuh khyh.

²¹ Minmin nynh sy kha looh lang yn pya hae, ka tuihaw zah misutui ariapaw kha nia lan yn pya hae.

²² Mih ccaboi tuh minmin hanlan kaang thua sah lah, minmin te a hobung hae paw hanlan taphung thua sah.

²³ Mih mit tuh ngaw a muih kho lei lan moh sah lah, mih tae tuh po thyngkuh sah.

²⁴ Na thinrianaw khate mih tungvaw bu hae lah, aruapaw na thin-unaw nynh phe phah hae sah.

²⁵ Mih ryahmin tuh ccungccaw dae sah lah, mih bu kya lu kheit san um nan hae sah.

²⁶ Pawccecize de na tah vae hae paw kha a tuaa a sah hae, vaemaw na muesah vae hae paw kha mah a buachih hae.

²⁷ Mih seinaw kyakhe seinaw kha biachihpah hae lah, na kyate seithyaanaw mue nan hae sah.

²⁸ Hiinnaw ccazing kyate minmin kha the thua hae sah; miding hae kya min ccazing lawbua thua nan hae sah.

²⁹ Thuasalama kae tuh zakawsangte vawsawnaw kya ka um; Pou Pachia, na khumnaw nynh kae kha yn thungkhaw sah.

³⁰ Pachia min kha hlaw te the ka hoysah cih; lungtuanaw byahote amaw kha ka thehoysah cih.

³¹ E hynh nynh aki te accumakeih umpaw tangnuapaw te silaw laeze Bawipaw kha a lungry a thuasah hua cih.

³² Tuaasahkunaw a ing hae paw nynh tuh-e tuh muih hae sah lah, mih lungtua sah; Pachia a ccung hae paw nanning, nae thawmuin sah.

³³ Bawipaw nynh ryachi hae bya kha a thaepya hae, thong lungkhu um hae paw amaw ccungccaw hae kha pawlangria leite um khyh hae.

³⁴ Vaawlui, laephi, rili hae te hynh-e hae kya a umpaw ahysuepaw balyn nynh amaw kha thehoysah hae sah.

³⁵ Pachia nynh Zion kha a khum cih zah, Judah khuapi kha a raethui cih; a see hae tuh tuin kya a um cih hae zah, tuh-e tuh a ccou cih hae;

³⁶ a see hae mih ccaawno hae nynh tuh-e tuh rho lang a ccou cih hae zah, amaw min a sungsah hae paw nynh tuin kya a um cih hae.