The Psalms 68 - Zotung Bible 2016

Thehoysahnaw te Lungtuanaw

David Hlaw

¹ Pachia tuh thokuh sah lah, a rhaw hae tuh phiariphiarae um hae sah; amaw a hua hae paw tuh amaw malang khe ccue hae sah.

² Maeekhuh kha khisan nynh a mung hawte, minmin kha ccaring a mung hae; khoilung tuh maee malang palae atui hawte, ccungccaw hoylei hae paw tuh Pachia malang roh hae sah.

³ Thuasalama miding hae tuh mih lungtua sah lah, Pachia malang mih lung myarya tua sah; lungtua lungpawte um hae sah.

⁴ Pachia kalan hlawsah oh, amaw min kha thehoysahnaw hlawsah oh; maeking vawlan a ccikuhpaw kha hlawsahpah oh, a min tuh Bawipaw nynh thua, amaw malang nae lungtua sah.

⁵ Ngawraw hae paaw thua zah, nomae hae kha a thungkhaw hae paw tuh a beikinnthyaa kya a umpaw Pachia nynh thua.

⁶ Pachia nynh vaevui zah a lanmepaw ccungccaw kha umnaw inn a pya; thongccah hae paw kha hoirumnaw kalan a cciakhae hae, thuasalama kaw-ei hae paw kha tuh ramrou kya a um hae.

⁷ Pou Pachia, na ccungccaw hae malang na cceih zah, ramkaw kya po he na cciakhae hae te,

⁸ laephi tuh hy zah, vaawlui kyate khuaa arah, tuh-e tuh Sinai Pachia, Pachia a umnaw, Israel Pachia, Pachia a umnaw kya nynh thua.

⁹ Pou Pachia, khuaa patae na rawsah zah, na rho athuapaw ram arou vae paw kha ramnopaw lang bua na tangsah.

¹⁰ tuin kyakhe na ccungccaw hae nynh umnaw a muihku hae; Pou Pachia, na hoynaw liate ryachi hae kha na bawm hae.

¹¹ Bawipaw nynh kaw a pya hae; tuh-e thongpang tuh nopi phu hae nynh cciakhae hae zah:

¹² “Rhawkaw hae mih siapharan hae tuh phe ccue hae!” a ci hae. Inn kya umpaw nopi hae nynh a luade hae paw uccaw hae kha a neeku hae,

¹³ tuh-e uccaw hae tuh tuukhia lungkhu a um hae zemah, ngun te theikuhpaw vahu sake hawte thua hae zah, sui ahinpaw te theikuhpaw aming hawte mah athua hae.

¹⁴ Athunghuapaw Pachia nynh siapharan hae he a phianaw hae tuh Zalmon Mua vawlan accahpaw vuiraw hawte nynh thua.

¹⁵ Pou alesaepaw mua, Bashan mua, ahangpaw sangpyng patae a hoipaw mua, Bashan mua!

¹⁶ Ahangpaw sangpyng patae a umpaw mua nynh, Pachia nynh um nawlan a rypaw mua, Bawipaw nynh zungzae a umnaw lanpaw mua kha pawccemou na eiung?

¹⁷ Athungpaw marangle athong-asan te Bawipaw tuh Sinai Mua kyate hmin thyaa lungkhu lang a tee.

¹⁸ Bawipaw tuh ahangnaw langkhe kae zah, kyngpaw ccungccaw hae kha ataruinte a cciakhae hae, ccungccaw hae kyate thuasah, amaw a dou hae paw kyate heize thuasah lasung a mue, Bawipaw Pachia tuh tuin kya a um cih.

¹⁹ Nin takyh aening phupaw oun phupahpaw Bawipaw tuh thehoyte um sah; Pachia tuh aening khumnaw nynh thua.

²⁰ Ah Pachia tuh khumnaw Pachia nynh thua, chinaw kyate luenaw tuh PACHIA, Bawipaw kya-e nynh thua.

²¹ Thuasalama Pachia nynh a rhaw hae lu kha thuasah, seinaw laanpi a zui hae paw lu kha thuasah a koi ccaccing cih hae.

²² Bawipaw nynh, “Minmin kha Bashan kyate ka kikhae cih hae, minmin kha rili akhupaw kyate ka kikhae cih hae,

²³ tuhteze nynh na rhaw hae chii kyakhe na ke cih, na ui hae nynh mah mih ry zeihte a lya cih hae,” a ci.

²⁴ Pou Pachia, huhan te na cciapaw kha muih athua vae, ka Pachia, ka Siapharan nynh beikinnthyaa lungkhu lang a teepaw kha muih athua vae,

²⁵ malang te hlawsah hae paw, nulang te a khuathya hae paw, tuh-e hae laku khe tyng a khua hae paw nopi hae a cceih hae:

²⁶ “Ccungccaw zapi pumkunaw kyakhe Pachia kha thehoysah oh, Pou Israel ciihan hae, Bawipaw kha thehoysah oh!”

²⁷ Malang kou khe, minmin lakuze asoi huapaw Benjamin phin hae a cceih hae, te Judah phin cciakhaetu hae te mih ccungccaw hae, Zebulun phin cciakhaetu hae te Naftali phin cciakhaetu hae nynh a zui hae.

²⁸ Pou Pachia, na thungnaw kha langsaku tua; Pou Pachia, langmawlya kaening elang nae cyipya vae hawte, na thawzung kha langsaku tua.

²⁹ Jerusalem khua umpaw na Beikinnpi liate siapharan hae nynh na kalan lasung ae ccyngpya hae.

³⁰ Phaeku laku a umpaw ramsaw hae kha thuasah, vaetua anopaw phu kha minphuin hae kya-e vaetua ano hae paw kha thuasah thuihei hae. ngunphua myarya a duaa hae paw kha syde hae; rhawtuknaw kya mih lungrythuapaw minphuin hae kha phiariphiarae nung hae.

³¹ Izip ram kyate sawpaw locceihtu hae oun thua cih hae; Ethiopia ccungccaw hae nynh Pachia kalan mih kuih kha arangte dyng hae sah.

³² Pou laephi peenaw hae, Pachia kalan hlawsah oh;

³³ Pou vaawlui a ccikuhpaw, arynpaw vaawlui hae, Bawipaw kalan thehoysahnaw hlawsah oh; amaw roi, athungpaw roi a sawpaw kha ngaetua oh.

³⁴ Pachia huhan tuh ahoy cite hotua oh, a lesaenaw tuh Israel hae tungvaw a um; a huhan tuh vaawlui kya a um.

³⁵ Pachia, Israel Pachia tuh a beikinnthyaa kya ri lan umpaw nynh thua; a ccungccaw hae kha huhan te thawzung a pya hae. Pachia tuh thehoysah thua sah!