The Psalms 67 - Zotung Bible 2016

Thehoysahnaw Hlaw

¹ Pachia nynh aening kha thaw oun ccih sah lah, hythua oun pya vae sah, te a mitmae tuh aening tungvaw awsah vae sah,

² tuhcite laephi ccungccaw hae nynh na laanpi kha a nyh cih hae zah, minphuin balyn nynh na khumnaw huhan kha a nyh cih hae.

³ Pou Pachia, ccungccaw hae nynh nang kha ae thehoysah hae sah; ccungccaw hae balyn nynh ae thehoysah hae sah.

⁴ Minphuin hae tuh mih lungtua sah lah, lungtuate hlawsah hae sah, pawccecize ccungccaw hae kha dingnaw te bya na pia hae zah, laephi vawlan e minphuin hae kha laan na mawpya hae.

⁵ Pou Pachia, ccungccaw hae nynh nang kha ae thehoysah hae sah; ccungccaw hae balyn nynh ae thehoysah hae sah.

⁶ Laephi nynh looh kha a pousah vae; Pachia, ah Pachia nynh hythua oun pya vae.

⁷ Pachia nynh aening kha hythuanaw po oun pya vae sah. laephi adianaw cia um hae paw ccungccaw hae balyn nynh amaw kha sawtua hae sah.