The Psalms 65 - Zotung Bible 2016

Luungnaw te Thehoysahnaw

David Hlaw

¹ Pou Pachia, Zion kya kae thehoysah cih; na kalan bya kae kinkupaw kha kae ccingsah cih,

² sawsangnaw a leihtupaw Pachia! Ccungccaw balyn tuh na kalan oun thua cih hae.

³ Ahoy leipaw cyisahnaw nynh kaening kha he oun tae tuh, kae cyiseimenaw kha nae ngaethya.

⁴ Na voidu lungkhu um khylan na po hae zah, na naesaku hae paw ccungccaw hae tuh lungtua hae paw nynh thua. Athyaapaw na beikinn athuapaw na inn kya-e ahoypaw uccaw khate phe kae byn cih.

⁵ Pou oun khumtupaw Pachia, ri lan umpaw cyisahnaw te kaening kha nae leih zah nae luesah; nang tuh laephi adianaw balyn kya te asaw huanaw rili kin kya um hae paw mih ngaehoinaw nynh na thua.

⁶ Na thawzung te mua hae kha na tynsah hae; tuhcite nang tuh thungnaw te phe na beih.

⁷ Rili a ccaepaw roi, tuileih a ccaepaw roi te ccungccaw hae nynh a siaruanaw hae kha na daesah.

⁸ Laephi asaw huanaw kya um hae paw tuh na muihsahnaw hae keiccuze a rih hae; khuanin athuanaw kya te a ccawnaw kya lungtuate na siasah hae.

⁹ Laephi kha na do-oih zah khuaa na rawsahpya, myarya na hoirumsah; Pachia vawkhu tuh tui te phe abeih; ccungccaw hae kha looh te na bawm hae, tuh-e tuh na paccynpaw nynh thua.

¹⁰ Athuekuh vae paw leikua kyakhe khuaa patae na rawsah, leikua kha na nginsah, laephi kha khuaatui te na nesah zah, apopaw ccacii kha hythua na pya.

¹¹ Na hoynaw khate kum kha looh na voisah; na ccianaw miakaw kya looh patae a um.

¹² Sahiin rampaeenaw patae a um, mua hae tuh lungtuanaw te phe abeih hae.

¹³ Ramnonaw miakaw kya tuu hae, miaa hae te phe abeih, abuenaw kyakhe ccathae te phe abeih, lungtuate sia hae zah pynkheihlan hlaw a sah hae.