The Psalms 58 - Zotung Bible 2016

Liarunaw elang Sawsangnaw

¹ Pou uktu hae, hmerarih lante bya na pia ccaccing oh tou? Ccungccaw hae kha hoyte bya na pia oh tou?

² Na pia khyh oh, nae thinlung kya hoyleinaw kha na paccynku oh; laephi vawlan nae kuih nynh puathonaw rya kha a law.

³ Ccungccaw hoyleipaw tuh a nung vue kyamawte a cceihsei vae; a pui takaw hae te hynbya hote a mesei hae.

⁴ Minmin tuh huparepaw sy te alokuhpaw sy a hoi hae, a nawpanpaw huparepaw hawte mih nakaring kha a huku hae,

⁵ tetuh hupaw a soihthyapaw roi kha thuasah, a thyaruhpaw mitleihthyapaw roi kha thuasah thae vae khyh.

⁶ Pou Pachia, mih khalang kya-e mih haw kha khya hae; Pou Bawipaw , chindeih ano hae paw nua kha pong khya!

⁷ Minmin tuh aluapaw tui hawte zo hae sah; lonua hawte syde hae sah lah, naan hae sah.

⁸ A ccia lyakhe palae tuipaw tangkaroh hawte thua hae sah; khuanin a muih boi leipaw ccaaw arohpaw hawte thua hae sah.

⁹ Maee aruapaw hinpaw ku kya-e asopaw kha ang nynh a ny mawkhe, hinpaw ku ahinpaw thuasah, aroupaw thuasah Pachia nynh thyaararih lan phi vae hae sah!

¹⁰ Tuh-e liarunaw kha miding hae nynh he a muih hae tuh mih lungtua cih; ccungccaw hoylei hae paw chii te mih ccu a singkuh cih hae.

¹¹ Ccungccaw hae nynh, “Miding hae hanlan lasung a um ccaccing; laephi vawlan bya a piatupaw Pachia tuh a um ccaccing,” cite a ho cih hae.