The Psalms 57 - Zotung Bible 2016

Bawmnaw elang Sawsangnaw

¹ Pou Pachia, ngaethya beih yn umsah, ngaethya yn umsah tua, pawccecize ka muisaw tuh namaw kya a rekuh; ronaw khise a dae mawlaezung, na sake mynlyh kaw khe ka rekuh cih.

² Ahang Huaccepaw Pachia kalan, ka hanlan a paccynnaw yn ccingsahpahpaw Pachia kalan ka sia.

³ Vaawlang te yn saw cih hae zah yn khum cih, yn syde hae paw kha maethya a lah cih hae. Atynpaw a sungsahnaw te a lungzinaw kha yn sawpah cih.

⁴ Karankute ccungccaw a teithyapaw chindeih hae laku khe ka ih; mih haw tuh ccoi te the hawte nynh thua hae. mih lae tuh ahepaw thaloi hawte nynh thua hae.

⁵ Pou Pachia, vaawlui luki cia thehoysah na thua vae. Na phu-enaw nynh laephi pynpi pong bong sah.

⁶ Minmin nynh ka ccianaw kya kaang yn syakhaw hae; ka muisaw tuh lungriathaete a um. Ka ccianaw khe hunghua yn thaekhaw hae, thuasalama tuh-e hunghua lungkhu lang mimaw toulou a ccah hae.

⁷ Pou Pachia, ka thinlung tuh tynkaring, ka thinlung tuh tynkaring. Hlaw ka sah cih zah the kae hoysah cih.

⁸ Ka muisaw, thotua! Pou tintang te phyly, thotua oh! Kae mah awkhua takaw te ka tho cih.

⁹ Pou Bawipaw , ccungccaw hae laku kya kae thehoysah cih; minphuin hae laku kya nang thehoysahnaw hlaw ka sah cih.

¹⁰ Pawccecize atynpaw na sungsahnaw tuh vaawlui cih ahang; na lungzinaw tuh maeking kyacia phe aphah.

¹¹ Pou Pachia, vaawlui luki cia thehoysah na thua vae. Na phu-enaw nynh laephi pynpi pong bong sah.