The Psalms 55 - Zotung Bible 2016

Ruiban hanlan Sawsangpyanaw

¹ Pou Pachia, ka sawsangnaw hynh yn thaepya tua; kae ngiakunaw hynh beih retawkuh nan.

² yn ngaepah lah, yn leihtua; ka lungriathae keiccuze myarya ka bang vae.

³ Ka rhaw hae kya-e siarisiaraepaw roi keiccu thuasah, ccungccaw hoylei hae paw nynh siaruanaw keiccu thuasah ka lungriathae. Ka tungvaw vawsaw yn pya hae zah, thinriate yn hua hae.

⁴ Ka lungkhu kya ka thinlung tuh rinaw te phe abeih, chi rawrinaw tuh yn thuanua vae.

⁵ Rinaw te thyngkunaw nynh yn thuanua zah, myarya lepaw rinaw nynh phang yn bong.

⁶ “Vahu hawte sake ka la hoi sah lah! Asawnaw lang ka zou cih zah, zya ka haeung cih paw.

⁷ Asawnaw lang ka ccue cih zah, ramkaw kya ka um cih;

⁸ khisan zawpaw te khise thopaw kyate rekunaw hmin muihku khylan ka rangsakuh cih,” ka ci.

⁹ Pou Bawipaw , mih lungmuasah hae lah, mih byaho kha tua-aesakuh hae; pawccecize khuapi lungkhu kya puathonaw te pekumaekunaw kha ka muih.

¹⁰ Khua koihlukuhpaw rhawlungrua kyakhe khuazi khuadae a cceih bungthung hae, khuapi lungkhu khe hoyleinaw te vawsawnaw a um;

¹¹ khua ngaelung khe ronaw a um; tuaasahkunaw te lingkunaw tuh khua lungkhu e kungkunaw hmin hae kya phe abeih.

¹² Kae yn sarya hae paw hynh ka rhaw hae thua khyh hae, a la thua hae lanze, ka ngaesang kho cih; kae yn lysanuakuh hae paw hynh yn rhawtu hae paw thua khyh, a la thua hae ze, ka retawkuh kho cih hae.

¹³ Thuasalama tuhte a cyihtupaw tuh nang na thua zah, kae te phe ah lokuhpaw, ka banpaw, kae ccawkuhpaw ka ruiban nynh na thua.

¹⁴ Lungtuate bya hoypaw kha ah hokuh oh zah, zapi hae ryte Pachia inn lang pynkheihlan ah cceih oh.

¹⁵ Chinaw nynh mih tungvaw thuanua hae sah; mih hiin pite Michi khua lang cceih hae sah; pawccecize hoyleinaw tuh mih inn kya te mih thinlung kya a um.

¹⁶ Kae tuh Pachia kha ka ko zah, Bawipaw nynh yn khum cih.

¹⁷ Zete, awkhua te ninthu ccyh khe bokhaekute ka hawkhaekuh zah, ka roi kha yn thaepah cih.

¹⁸ Rhaw ka tuknaw kyate vaemaw mue leite kae kha yn shawkhaw cih, pawccecize ccungccaw patae tuh kae kha rawsete a um hae.

¹⁹ Langmawlya mawte bawitungkhung kya a haungpaw Pachia nynh a thae cih zah, minmin kha zakaw a sangsah cih hae, a paleihku khyh keiccu hae ze, Pachia kha rih khyh hae.

²⁰ Ka banpaw nynh a banpaw kha a kuih hangnua zah, amaw byakin kha zui khyh,

²¹ a bya tuh thawpah laeze anaw lante hothya salamah, rhawtukku rynaw thinlung a hoi; a bya tuh chitui laeze nehua salamah, poh thuaakuhpaw thaloi nynh thua.

²² Na phupaw kha Bawipaw kya nung lah, nang kha ae bawm cih; miding kha shungnaw kharouh pya boi lan khyh.

²³ Thuasalama, pou Pachia, minmin kha akhu huaccepaw hunghua lungkhu lang na sahbung cih hae; ccungccaw theih hae paw te mihyn hae tuh mih hiinshe angankuh cia hiin lan khyh hae. Thuasalama kae tuh nang kha kae doliakuh cih.