The Psalms 51 - Zotung Bible 2016

Seingaethyanaw hanlan Sawsangnaw

¹ Pou Pachia, atynpaw na sungsahnaw thyhte thaw yn ccitua; na thawccinaw alepaw liate ka cyiseimenaw kha yn thyaasahpya tua.

² Ka hoyleinaw kha marya yn singpah lah, ka seinaw kyate yn thyaasah tua.

³ Pawccecize ka cyiseimenaw kha ka nyhkuh zah, ka seinaw tuh palei ka syntaw.

⁴ Nang kha rawsete namaw kya ccaccei phe ka sei vae, na muihnaw kya hoyleinaw phe ka rae vae, tukeiccuze na byapaenaw tuh kyh zah, bya na pianaw kya ccaenaw um khyh.

⁵ Ka pui takaw mawte seinaw ka hoi, ka nung nynh yn poi lya mawte misei nynh ka thua.

⁶ Adingpaw thinlung kha na ry, tukeiccuze ka thinlung kya hawnaw kha yn ccangpya tua.

⁷ Hyssop khate yn thyaasah lah, ka thyaa cih; yn sing lah, vuiraw laeze ka rawhua cih.

⁸ Lungtuanaw te lungpawnaw bya kha yn thaesah tua; tetuh nae khya vae paw ka ru hae tuh mih lungtua cih.

⁹ Ka seinaw kyate na mae kha yn retawkuh lah, ka hoyleinaw balyn kha yn zosahpya tua.

¹⁰ Pou Pachia, ka lungkhu kya athyaapaw thinlung kha raetua, athawpaw te akyhpaw tuanaw kha ka lungkhu kya yn sangtua.

¹¹ Na umnaw kyate yn dee nan lah, na thyaa muisaw kha ka kyate yn lawpah nan.

¹² Na khumnaw kyate yn thuapaw lungtuanaw kha bua yn pya lah, kawngaenaw thinlung kha yn hoisah.

¹³ Tetuh na laanpi kha misei hae ka ccangpah cih hae zah, misei hae nynh na kalan yn ki cih hae.

¹⁴ Pou Pachia, yn khumtu Pachia, ccungccaw chianaw kyate yn luesah lah, nae luesahnaw kha myarya ccae lante hlaw ka sah cih.

¹⁵ Pou Bawipaw , ka munglae yn hungpah lah, ka khalang nynh na thehoynaw kha a siakhae cih.

¹⁶ Silawnaw kha na lungrythua khyh; na lungry a la thua lanze, he kae pya cih paw, maee-ute silawnaw ka la rae lan zemah, na lungrythua lan khyh.

¹⁷ Pachia nynh a rypaw silawnaw tuh akoipaw thinlung nynh thua; Pou Pachia, akoipaw te angaesikuhpaw thinlung kha na vua he khyh.

¹⁸ Na thawccinaw liate Zion khe hoynaw raepya tua; Jerusalem khualungrua kha raethui tua,

¹⁹ tetuh akyhpaw silawnaw, maee-ute silawnaw te apyn balyn maee-ute silawnaw kyakhe na lungry athua cih; tetuh na silawhang vawlan khe tangnuapaw hae khate silaw athua vae cih.