The Psalms 5 - Zotung Bible 2016

Khynnaw elang Bawipaw Doliakunaw

David Hlaw

¹ Pou Bawipaw , ka bya hynh yn ngaepya tua lah, ka hawkhaekunaw roi hynh yn thaepya tua.

² Ka Siapharan te ka Pachia, na kalan saw ka sang zah, ka siapaw roi hynh yn ngaepya tua.

³ Pou Bawipaw , awkhua ccyh kya ka roi kha na thae; awkhua ccyh kya kae ngia zah kae ngaw.

⁴ Pawccecize nang tuh hoyleinaw raenaw kya a lungrythuapaw Pachia na thua khyh; ahoy leipaw tuh na kya umbua lan khyh.

⁵ Alysakuhpaw tuh na malang thadyn lan khyh; ahoy leipaw a rae hae paw kha na hua hae.

⁶ Hynbya a ho hae paw kha na ro hae; ccungccaw a theih rypaw te ahyn-ahu hae paw kha Bawipaw nynh na hua hae.

⁷ Thuasalama kae tuh atynpaw na sungsahnaw alepaw liate na inn lungkhu lang ka tee cih, namaw rawrite athyaapaw na beikinn kyakhe kae beik cih.

⁸ Pou Bawipaw , ka rhaw hae keiccuze na dingnaw kyakhe yn cciakhae; na laanpi kha ka malang yn lawsahpya tua.

⁹ Ka rhaw hae khalang kya byaccing um khyh; mih thinlung tuh ronaw nynh thua; mih lotharue tuh ahungkuhpaw shaw nynh thua. mih lae khate nawpalya lan a lingthya hae.

¹⁰ Pou Pachia, mih seinaw mee kha ingsah hae; mih tuakunaw keiccu khuliakuh hae sah; mih cyiseimenaw alung keiccu thuasah, nang ae rawse keiccu hae thuasah minmin kha ccaring dee hae.

¹¹ Na kya a rekuh hae paw balyn tuh mih lungtua sah; lungpawte hlawsah zungzae hae sah. Na min a sungsah hae paw tuh namaw liate mih lung atua nawlan, minmin kha thungkhaw hae.

¹² Pou Bawipaw , adingpaw kha hythua na pya; na thawccinaw khate khawriaphua hawte na thungkhaw.