The Psalms 49 - Zotung Bible 2016

Hoirumnaw Doliaku tuh Ngaeenaw

¹ Nanning, ccungccaw hae balyn, e hynh thaetua oh, laephi kya a um hae paw balyn,

² a nepaw te a hangpaw parouhte, a hoirumpaw te a ryachipaw nae balyn te ngaetua oh.

³ Ka khalang nynh hawnaw bya kha a ho cih; Ka thinlung tuh hawnaw te asekuhpaw kha nynh a tua.

⁴ Ka nakaring kha phungtangbya kalan ka tuakuh cih; byakhupaw kha tintang khuakute ka ccaesah cih.

^5-6 Ccungccaw hoyleipaw ka rhaw hae, mih sisua doliakuh hae zah mih hoirumnaw patae khate a pookuh hae paw nynh yn koihlu hae zah ka vawsaw ccyh lyakhe pawcce ka rih cih?

⁷ Thanccingte, ccungccaw lu kheit hiinnaw shawkhawnaw lanpaw pawpaw mah um khyh, hiinnaw hanlan Pachia kalan pya kho lanpaw amee um khyh.

^8-9 Pawccecize zungzae hiin nawlan te shawku kha kharouh muih khyh nawlan, hiinnaw shawkhawnawpaw tuh amee myarya ru zah zaw kho khyh.

¹⁰ Mihawpaw tuh a chih; tuhawte mingaeepaw te tuanaw hoi leipaw mah chih hae zah, mih sisua hae tuh ming hae elang a cciatawpya hae.

¹¹ Mih shawku tuh zungzaete mih inn nynh thua, loram hae kha mimaw min a la phu hae zemah, mih umnaw hmin hae tuh she takyh hanlan nynh thua.

¹² Ccungccaw tuh a lesaenaw kya tynkhaekuh khyh; a chihthyapaw sarangpaw te nynh a loku.

¹³ Mimaw te mimaw a doliakuh hae paw, mih hoirumnaw te mih ngaengankhaekuh hae paw tuh mih tungvaw pawmou acyihkuh cih cipaw dotua oh.

¹⁴ Minmin tuh tuu hae hawte michi khua hanlan nungdae athua hae paw nynh thua; Chinaw tuh mih tuurinpaw athua cih; shawku langkhe lawbabin lan rungbung hae zah, mih pyn tuh azo cih; Michi khua tuh mih inn athua cih.

¹⁵ Thuasalama Pachia nynh kae kha yn ccou keiccuze ka muisaw kha Chinaw huhan kyate yn shawkhaw cih.

¹⁶ Ccungccaw abang tuh oun hoirum hae zah, mih inn e sisua tuh he oun lungthung vae ze, na thinphang nan sah.

¹⁷ Pawccecize he a chih hae te, pawpaw mah phukuh lan khyh hae; mih sisua tuh mih nulang zuikuh bua lan khyh.

¹⁸ Mih hiin lungkhu khe mimaw te mimaw kha a lungtuapaw lang a riaku hae zemah, mimaw elang kou hoy lan rya a lawku hae ze mih thehoy zemah,

¹⁹ awnaw a muihthui lei vae cih hae paw mih minpaaw hae phu kalan khe a cceihbua cih hae.

²⁰ Ccungccaw tuh a lesaenaw kya tynkhaekuh khyh; a chihthyapaw sarangpaw te nynh a loku.