The Psalms 48 - Zotung Bible 2016

Zion Phu-enaw

¹ Bawipaw tuh alesaepaw thua zah, ah Pachia khuapi kya, athyaapaw a mua vawlan khe alesae lante thehoysah lanpaw nynh thua.

² Hang zah apuithyapaw Zion Mua tuh, laephi pynpi lungtuanaw a pyapaw nynh thua, alesaepaw Siapharan khuapi tuh asawnaw thahlang nynh a um.

³ Tuh-e khuapi rhawlungrua a lungkhu kya tuh khynnaw a um cipaw kha Pachia nynh a langsaku vae.

⁴ Tetuh siapharan hae tuh pumkuh hae zah, pynkheihlan oun cceih hae.

⁵ Zion Mua kha he a muih hae tuh myarya a rih hae; siikuh hae zah a ccue hae;

⁶ minmin tuh tuin kya thyngkuh hae zah, neitangia a ccihpaw nopi hawte mih vawsaw,

⁷ nithua lang e khisan nynh Tarshish sanphalung kha a ro lya hawte nynh athua hae.

⁸ Aening nynh ah thae vae oh hawte, vaaw Bawipaw khuapi kya, ah Pachia khuapi kya ah muih vae oh. Pachia nynh tuh-e khuapi tuh zungzae a tynsah cih.

⁹ Pou Pachia, atynpaw na sungsahnaw kha na beikinn lungkhu khe kae tua.

¹⁰ Pou Pachia, laephi adianaw cia ae thehoysah hae hawte, na min tuh athaan. Na ranglang kuih tuh taenaw te phe abeih.

¹¹ Bya na pianaw liate, Zion Mua tuh a lungtua sah lah, Judah ram e khua hae tuh mih lungtua sah.

¹² Zion khua kha voilute cceih oh lah, a rhawviainn hae kha riatua oh,

¹³ rhawhohung hae kha hoyte dotua oh lah, rhawlungrua hae kha phe do mamia oh; tetuh she thawpaw kya-e ccungccaw hae kyakhe,

¹⁴ “E Pachia tuh zungzae te zungzae cia ah Pachia nynh thua. Zungzae oun cciakhaepaw athua cih,” cite na hopah kho cih oh.