The Psalms 46 - Zotung Bible 2016

Pachia Thungkhawnaw

¹ Pachia tuh aening khynnaw te thawzung nynh thua, vawsaw ccyh lya zungzae oun bawmtu nynh thua.

² Tukeiccuze laephi tuh nuekuh zah, mua hae tuh hy hae zah rili lungkhu lang a ccaw hae zemah kae rih lan khyh;

³ rili tuh tuileih thote aroi ccae zah a thyhleihku zemah, mua hae tuh a hy hae zemah, kae rih lan khyh.

⁴ Ahang Huaccepaw kya-e athyaapaw umnaw, Pachia khualipi kha a lungtuasahpaw vawpi vakheit a um.

⁵ Pachia tuh tuh-e khuapi lungkhu um zah, tuh-e tuh roh vae lan khyh; Pachia nynh tuh-e khuapi tuh awkhua takaw te a bawm cih.

⁶ Minphuin hae tuh siarisiarae a um hae, peenaw hae tuh a hy hae; A roisaw zah laephi tuh tui lang a tang.

⁷ Vaaw Bawipaw tuh aening kya a um; Jakob Pachia tuh aening khynnaw nynh thua.

⁸ Rang oh, Bawipaw a ryalawnaw hynh dotua oh; laephi vawlan a thuakhaepaw ronaw hynh dotua oh.

⁹ Laephi pynpi adianaw cia rhaw a daesah; li kha khya zah ccoi kha zoihtatyh lan a khya; khawriaphua hae kha maee te a u.

¹⁰ “Zya dae oh, kae tuh Pachia nynh ka thua cipaw nyh oh! Minphuin hae kya kae tuh hangthung ka thua, laephi kya hangthung ka thua,” a ci.

¹¹ Vaaw Bawipaw tuh aening kya a um; Jakob Pachia tuh aening khynnaw nynh thua.