The Psalms 45 - Zotung Bible 2016

Siapharan Zudynaw Hlaw

¹ Ka thinlung tuh bya hoypaw te phe abeih, siapharan elang hlaw ka phua lyahin; ka lae tuh ccaw zeithyapaw bawpe te nynh aloku.

² Nang tuh pise hae lakuze pynrua apuithya huaccepaw nynh na thua; na munglae kya thawccinaw bya te phe abeih; tukeiccuze Pachia nynh nang kha zungzae hythua ae pya.

³ Pou athungpaw siapharan, na phu-enaw te na lesaenaw na thaloi kha na phae kya saeku tua.

⁴ Byaccing te dingnaw kha tynsah khylan na lesaenaw langsakute taenaw khate cciku tua. na ranglang kuih nynh ri lan umpaw ryalaw kha ae ccangpah sah.

⁵ Na the tuh he zah, siapharan a rhaw hae bung kyacia a thuing hae; ccungccaw hae tuh na ccuphe kaw a khuliakuh hae.

⁶ Pou Pachia, na bawitungkhung tuh zungzae te zungzae cia atyn. Na ram kha dingnaw te na uk;

⁷ dingnaw kha na ry zah hoyleinaw kha na hua. Tukeiccuze na Pachia athuapaw Pachia nynh na ruiban hae laeze nang kha lungtuanaw chitui ae thuh vae;

⁸ na angkiccuapaw tuh mura zimuin, aloes zimuin te kassia zimuin hae khate a myn akhuh. Saepaw nua te sakpaw siapharan inn hae kyate arui suikuhpaw khuakupaw uccaw hae nynh na lung ae pawsah hae;

⁹ sawtua lan umpaw na nopi hae kyakhe siapharan ccanung hae mah a umbua hae; na ranglang khe Ofir sui hoypaw a lawkuhpaw siapharannung a thadyn.

¹⁰ Pou ccanung, ngaetua, tuatua lah, na nakaring yn tuaku tua; na ccungccaw hae te na paaw inn kha ningtua,

¹¹ siapharan nynh na puithyanaw kha a ry cih. Aning tuh na bawipaw athua keiccuze amaw kha beiktua;

¹² Tair khua e ccungccaw hae nynh thuasah, a hoi huaccepaw ccungccaw hae nynh sisua aphuinphuin te thuasah, lasung khate namaw kya maehoynaw yn ccungkuh cih hae.

¹³ Siapharan ccanung tuh amaw khaan lungkhu khe sui law te kuakuhpaw boeining kha lawkute a um;

¹⁴ myarya puithyapaw a boeining khate siapharan kalan a cciakhae hae; liaccady hae te a ruiban hae nynh a nulang te a zui hae.

¹⁵ Lungtua lungpawte cciakhae hae zah, siapharan inn lang a tee hae.

¹⁶ Pou siapharan, nang nynh na minpaaw hae ccelang, ccapaw hae kha na saah cih; minmin kha laephi pynpi kya uktu hae lang na tangsah cih hae.

¹⁷ She takyh kya na min ka thaansah cih; tukeiccuze ccungccaw hae nynh zungzae te zungzae cia ae thehoysah cih hae.