The Psalms 44 - Zotung Bible 2016

Bawmnaw elang Sawsangnaw

¹ Pou Pachia, langmawlya kae minpaaw hae she kya na la cyipaw kha minmin nynh yn hopah hae zah, kae nakaring te phe kae thae vae:

² minphuin hae kha na kuih te na dee hae zah, na ccungccaw hae kha na umsah hae; ccangpaw minphuin hae kha vawsaw na pya hae zah, na ccungccaw hae kha na luesah hae;

³ mih thaloi liate ram kha tae khyh hae, mih kuih nynh taenaw pya khyh hae; mih tungvaw na lungrythua keiccuze, na ranglang kuih te na mitmae awnaw liate ram kha a tae hae.

⁴ Nang tuh ka Siapharan te ka Pachia nynh na thua; nang nynh Jakob phuin kha taenaw na pya.

⁵ Namaw liate kae rhaw hae kha kae khulia hae; na min liate kae rhaw hae kha kae syde hae.

⁶ Ka li kha ka doliakuh khyh zah, ka thaloi nynh mah yn khum kho khyh.

⁷ Thuasalama kae rhaw hae kyate nae khum vae zah, kaening oun hua hae paw kha mih mae na thyasah vae hae.

⁸ Kaening tuh Pachia kya palei kae pookuh zah, na min kha zungzae kae thehoysah cih.

⁹ Thuasalama kaening kha phe nae vua vae zah, maethya nae law vae, kae rhawkaw hae kya na cceihbua vae khyh.

¹⁰ Kaening kha rhaw hae malang khe nae ccuesah zah, kae rhaw hae nynh uccaw oun luade vae hae.

¹¹ Kaening kha chia lanpaw tuu hawte nae nungde vae zah, minphuin ccangpaw hae laku kya phiariphiarae nae nung.

¹² Na ccungccaw hae kha amee beihtaraw lan nae zua zah, tuh-e amee tuhte amia na muelae khyh.

¹³ Kaening kha kae innpaw hae nynh a sarya hae paw lang nae rae zah, kae pepan um hae paw nynh a theihrya hae paw te a nuinse hae paw lang nae rae.

¹⁴ Minphuin hae laku kya theihryapaw minphuin lang nae rae zah, ccungccaw hae laku kya saryate nuinsepaw lang nae rae vae.

^15-16 Saryatu hae te thethyasahtu hae bya keiccu thuasah, rhaw te liarutu hae mitmae keiccu thuasah kae tuh thethyanaw palei ka mue zah, maethyanaw nynh ka mae phang yn bong.

¹⁷ E hae balyn tuh kae tungvaw a thua ccaw zemah, kaening nynh nang kha kae ning khyh zah, na byakinnaw kha kae roh khyh.

¹⁸ Kae thinlung tuh nulang sihkuh khyh, kae ccianaw tuh na laanpi kyate maekuh khyh,

¹⁹ tuhzemah suizaw hae umnaw kyakhe kaening kha nae khya zah, marae zipaw mohnaw te phang nae bong.

²⁰ Kae Pachia min kha kae ning zah, ccangpaw pachia kalan khe kae kuih kae daw lanze,

²¹ tuh-e tuh Pachia nynh langsakuh lan khyh tou? Pawccecize Pachia nynh thinlung kya thuruhpaw kha a ny.

²² Nang keiccuze kaening tuh anin ninlang oun theih hae zah, chia lanpaw tuu lang nynh oun ria hae.

²³ Pou Bawipaw , thoku tua! Pawcce na i? Thaekuh ccavae, kaening hynh zungzae yn vua nan!

²⁴ Pawcce na mae nae retawku? Kae teingnaw te oun tuaasahnaw hae hynh pawcce na ning?

²⁵ Laenoi te nae kalouh vae; kae pyn tuh laephi kya phang bekuh vae.

²⁶ Tho lah oun bawmtua. Atynpaw na sungsahnaw liate oun shawkhawtua.