The Psalms 39 - Zotung Bible 2016

Hawnaw hanlan Sawsangnaw

David Hlaw

¹ “Ka munglae te ka sei khyh nawlan ka cyisahnaw kha ka raeringkuh cih; ka umnaw kya ccungccaw hoyleipaw a um lungkhu tuh byaho leite ka khalang ka myh cih,” ka ci.

² Yccae leite zya ka dae; ahoypaw kong heize ka ho khyh; ka lungriathaenaw tuh houhouh alethung,

³ ka lungkhu kya ka lungvawsaw. Ka tua cciamang lyakhe ka lungvawsawnaw tuh maee lang arua; tetuh ka munglae te,

⁴ “Bawipaw , ka hiin ccyh athangnaw te ka hiinnaw ccyh kha beih yn nysah tua; ka hiinnaw hynh hohcihmou adyn cipaw beih yn nysah,” cite ka ho.

⁵ Ka hiinnaw hynh zapae kyalya asae lante nae rae zah, ka hiinshe hynh na muihnaw kya accakaepaw hawte nynh thua. Thanccingte, ccungccaw miakaw hynh vaekheit hysuepaw khivae hawte nynh thua.

⁶ Thanccingte, ccungccaw miakaw hynh mynlyh hawte nynh a ccia bungthung hae. Thanccingte, accakaepaw elang rya a suhsaku hae; sisua kha ccakhung hae zah, hum nynh a ccou cih cipaw nyh khyh hae.

⁷ Tuhte athua keiccuze, pou Bawipaw , kae nynh pawmou ka ngaehoi? Ka ngaehoinaw tuh namaw kya rou nynh a um.

⁸ Ka cyiseimenaw balyn kyate yn luesah. Mingaee hae nynh a theihrya hae paw lang yn tangsah nan.

⁹ Hynh-e a cyihtupaw hynh namaw na thua keiccuze, yccae leite zya ka um; bya kaw kheit san ka ho khyh.

¹⁰ Yn zia yn bua nan; na kuihlung te nae thung keiccuze ka thawthang vae.

¹¹ Ccungccaw kha a seinaw keiccuze detahnaw te na thuihei, minmin nynh a ry hae paw kha laehaw hawte na ropya hae; thanccingte, ccungccaw miakaw tuh vaekheit hysuepaw khivae sasaw nynh thua hae.

¹² Pou Bawipaw , ka sawsangnaw yn thaepah lah, ka siaruanaw yn ngaepya tua; ka mitphi lua lya daebabi lan yn umtaw nan. Ka minpaaw hae balyn hawte, kae tuh a cceih bungthungpaw na mikhia nynh ka thua.

¹³ Ka chih zah ka zo maw hin, lungtuanaw bua ka mue nawlan, na mae kha ccanglang yn hawitaw tua.