The Psalms 38 - Zotung Bible 2016

Vawsaw Tungpaw elang Sawsangnaw

David Hlaw

¹ Pou Bawipaw , thinriate yn pe nan, thin-ute yn thuihei nan.

² Pawccecize na the hae nynh ka lungkhu lang yn thuing zah, ka tungvaw na kuih nae sawnua vae.

³ Na thinria keiccuze ka pyn kya dannaw um khyh; ka seinaw keiccuze ka ru kya dannaw um khyh.

⁴ Ka seinaw nynh ka lu yn vu vae; tuh-e tuh phupaw ripaw hawte ka hanlan myaryamaw ari.

⁵ Ka ngaeenaw keiccuze ka vaemaw tuh ccihthung zah anae akhua;

⁶ baruh ka bakhung zah phe ka dawleihkuh; anin ninlang rawkhuite ka khiakuh.

⁷ Ka tae tuh sozazaepaw vaemaw te phe bia keiccuze, ka pyn kya dannaw um khyh.

⁸ Ka thawthang zah, phe ka kinkuh; ka lungriathae keiccuze ka hawkhaekuh.

⁹ Pou Bawipaw , ka rypaw balyn tuh marya na ny; ka hawkhaekupaw roi tuh na kyate thuruh kho thua khyh.

¹⁰ Ka bung tuh thyngkuh zah ka thawthang; ka mit tuh ngawmuih vae khyh.

¹¹ Ka ruiban hae te kae ccawkuh hae paw nynh ka vaemaw keiccuze yn sibia hae zah, ka innpaw hae nynh mah yn naekuh vae khyh hae.

¹² Ka hiinnaw yn hawkuh hae paw nynh kaang yn syakhaw hae; Vawsawnaw pya yn ry hae paw nynh kae kha ro lanpaw byaho hae zah, anin ninlang ling lanpaw kha a paccyn hae.

¹³ Thuasalama kae tuh a nawpanpaw hawte ka thua zah, ka thae khyh; bya a ho kho leipaw hawte nynh ka thua.

¹⁴ Naw a thae leipaw hawte ka thua ccaccing zah, bya a khung kho leipaw hawte nynh ka thua.

¹⁵ Thuasalama, pou Bawipaw , nang kha kae ngaehoiku; Pou Bawipaw ka Pachia, nang tuh bya yn leihru cih paw nynh na thua.

¹⁶ “Minmin tuh ka tungvaw mih lungtua nan sah, ka ccu a thei lyakhe kae kha rawsete yn poonuakuh nan hae sah,” cite saw ka sang.

¹⁷ Pawccecize vyavya ka khuliakuh zah, ka ngesaw ccinaw tuh ka kya phang a um.

¹⁸ Ka seinaw kha ka phyku; ka seinaw keiccuze ka ngaethah.

¹⁹ Ka rhaw hae tuh akonglang um leite mih thawsae, asuilan um leite yn huapaw patae a um hae.

²⁰ Ahoypaw kha ka zui keiccuze hoynaw kha hoyleinaw te yn liaru hae paw tuh ka rhaw hae nynh thua hae.

²¹ Pou Bawipaw , beih yn vua nan; Pou ka Pachia, kae te beih sawkuh nan;

²² Yn khumtupaw, pou Bawipaw , rangsakute beih yn bawmtua.