The Psalms 37 - Zotung Bible 2016

David nynh A Doliakunaw

David Hlaw

¹ Ccungccaw hoyleipaw keiccuze na thinphang nan sah; hoyleinaw a raetu hae tungvaw na eiung nan sah,

² pawccecize aro mawze lonua hawte a zo cih hae zah, ahinpaw aku anaan hawte anaan cih hae.

³ Bawipaw kha doliakuh lah, hoynaw kha raetua; tetuh ram lungkhu kya na um cih zah, khyndadyh lan na lungtua cih.

⁴ Bawipaw kya na lungryccing sah, na thinlung nynh a rypaw kha ae pya cih.

⁵ Na hiinnaw kha Bawipaw kalan aptua, amaw kha doliakuh lah, ae cyipah cih.

⁶ Na dingnaw kha awnaw hawte a awsah cih zah, ahmete na cyipaw kha ninthu hawte a awsah cih.

⁷ Bawipaw malang daebabi lan um lah, amaw kha lungsaete ngawtua; mih hiinnaw kya mih laan mih sui ua hae paw, ahoy leipaw paccynnaw rya a lah hae paw keiccuze na thinphang nan sah.

⁸ Thinrianaw kha sungkuh lah, thin-unaw kha vuatua. Thinphangte um nan, tuh-e nynh hoyleinaw kyalya kha a thuakhae.

⁹ Ccungccaw hoylei hae paw kha vua athua cih hae, thuasalama Bawipaw a ngaehoikuh hae paw tuh ram kha rho lang a ccou cih hae.

¹⁰ Sosoh kyakhe, ccungccaw hoylei hae paw tuh um vae lan khyh hae; mih umnaw kha hoyte na do zemah, tuin kya na muih vae lan khyh hae.

¹¹ Thuasalama thinlung ane hae paw tuh ram kha rho lang a ccou cih hae zah, myarya lepaw daenaw kyakhe mih lungry accing cih.

¹² Ccungccaw hoyleipaw nynh midingpaw kha rawsete khuakhankuh zah, a haw kha a zynua;

¹³ thuasalama Bawipaw nynh tuh ccungccaw hoylei hae paw kha a nuinse hae, pawccecize mih ccyh yn thua lanpaw kha a ny.

¹⁴ Ccungccaw hoylei hae paw nynh ryachi hae te minyaa hae kha khulia khylan te, kyhrarih lan a hiin hae paw kha chia khylan, thaloi kha thuaakuh hae zah, mih li kha a sue hae;

¹⁵ mih thaloi nynh mimaw bung kha a thuing cih zah, mih li hae kha khyapya athua cih.

¹⁶ Miding nynh a hoipaw beihtaraw tuh ccungccaw hoyleipaw nynh a hoipaw patae laeze ahoyhua.

¹⁷ Pawccecize ccungccaw hoyleipaw kuih tuh khya athua cih, thuasalama Bawipaw nynh midingpaw kha a thungkhaw cih.

¹⁸ Bawipaw nynh ccaenaw um lei hae paw ccyh kha nyh zah, mih rho tuh zungzae atyn cih;

¹⁹ ccyh hoyleipaw kya maethyanaw mue khyh hae, ccakan acci lya ae lanpaw kha alaelui lan a hoi hae.

²⁰ Thuasalama ccungccaw hoylei hae paw tuh a roh cih hae, Bawipaw rhaw hae tuh ramkaw e lonua phu-enaw te nynh aloku hae, maeekhuh hawte azo cih hae.

²¹ Ccungccaw hoyleipaw nynh tuh laebah kha lah zah sangru khyh, thuasalama miding hae tuh hysahnaw hoi hae zah, leih a pya hae;

²² Bawipaw hythuanaw a ccou hae paw nynh ram kha rho lang a ccou cih hae, thuasalama amaw nynh thya a law hae paw tuh vua athua cih hae.

²³ Ccungccaw nynh a ccianawpaw laanpi kha Bawipaw nynh a lungrythua ze, a laanpi kha a tynsah pya;

²⁴ a thyku zemah khuliakuh lan khyh, pawccecize Bawipaw nynh a kuih kha phang a kyng.

²⁵ Atu tuh ka taw vae zah ka no vae khyh, tuhzemah miding kha vua athuapaw ka muih boi khyh, a ccaaw hae nynh looh a ngiaku hae paw kha mah ka muih boi khyh.

²⁶ Aning nynh lung-uate leih pya zungzae hae zah, a koiisaku zungzae hae, te a ccaaw hae tuh hythuanaw a ccou hae paw lang a tang hae.

²⁷ Hoyleinaw kha cciataw lah, hoynaw kha raetua; tetuh zungzae na um vae cih.

²⁸ Pawccecize Bawipaw nynh byading kha a ry; alungzipaw a mithyaa hae kha vua lan khyh hae. Miding hae tuh zungzae khynsah athua cih hae, thuasalama ccungccaw hoyleipaw a ccaaw hae kha tuh vua athua cih hae.

²⁹ Miding hae nynh ram kha rho lang a ccou cih hae zah, tuin kya zungzae a um cih hae.

³⁰ Miding hae khalang nynh hawnaw bya kha ho zah, mih lae nynh byading kha a ho.

³¹ Mih Pachia kawbya tuh mih thinlung kya a um; mih laanpi tuh naw khyh.

³² Ccungccaw hoyleipaw nynh midingpaw kha buhkhaw zah, chia lan a ccung.

³³ Thuasalama Bawipaw nynh midingpaw kha ccungccaw hoyleipaw kuih kalan vua lan khyh, byapia lan a cciakhae hae ze, seibenaw ing lan khyh.

³⁴ Bawipaw kha ngaehoikuh lah, a laanpi kha zuitua, ram kha rho lang ccou khylan ae hangthung cih; ccungccaw hoylei hae paw tuh ro athua hae paw kha na muih cih.

³⁵ A rysawthahpaw ccungccaw hoyleipaw kha ka muih vae, aning tuh Lebanon e sidar thingku hawte ming hae laeze a hangsakuh hua.

³⁶ Nyalang a pepan bua ka cceih tuh, um vae khyh; ka ccung zahmah ka muih kho vae khyh.

³⁷ Ccaenaw um leipaw ccungccaw kha syntawnaw rae lah, midingpaw kha dotua, pawccecize daebabipaw ccungccaw tuh ccaawno a hoi.

³⁸ Thuasalama misei hae tuh khaleih ro athua cih hae; ccungccaw hoylei hae paw mih ccaawno hae tuh vua athua cih hae.

³⁹ Miding hae kya-e khumnaw tuh Bawipaw kyate nynh yn thua; aning tuh vawsaw ccyh lya mih khynnaw nynh thua.

⁴⁰ Bawipaw nynh minmin kha bawm hae zah, a luesah hae; amaw kya a reku hae keiccuze, ccungccaw hoylei hae paw kyate luesah hae zah, a khum hae.