The Psalms 36 - Zotung Bible 2016

Ccungccaw Seinaw

David Hlaw

¹ Seinaw nynh ccungccaw hoyleipaw a thinlung kyakhe bya a hopya; a mit kya Pachia rawrinaw um khyh.

² Pachia nynh a hoyleinaw kha muih khyh zah hua khyh cite tuakuh zah, amaw te amaw kha a pooku.

³ A khalang kya-e bya tuh ahoy leipaw te lingpaw bya nynh thua; hawrarih lante um khyh zah, hoynaw kha rae khyh.

⁴ A ikhung vawlan a i lyakhe ahoy leipaw kha a tua; ahoy leipaw laanpi kha zui zah, hoyleinaw kha vua khyh.

⁵ Pou Bawipaw , atynpaw na sungsahnaw tuh vaawlui phe phah zah, na lungzinaw tuh maeking kya phe aphah.

⁶ Na dingnaw tuh mua pipi te lokuh zah, na byapianaw tuh akhupaw rili te nynh aloku; Pou Bawipaw , ccungccaw te sarangpaw kha phe lokuh lante na khum hae.

⁷ Pou Pachia, atynpaw na sungsahnaw tuh pawcih baban aphute! Ccungccaw balyn tuh na sake mynlyh kyakhe a rekuh cih hae.

⁸ Na inn kya-e myarya lungpaw looh kha ae hae zah, na lungrythuanaw vawkhu e tui kha nia lan na pya hae.

⁹ Pawccecize namaw kya hiinnaw tuidy a um; na awnaw kyakhe awnaw kha kae muih.

¹⁰ Nang ae nyh hae paw kya atynpaw na sungsahnaw tuh zungzae tynsah tua lah, thinlung ading hae paw kya na khumnaw tuh zungzae tynsah tua!

¹¹ A lysakuh hae paw ccu nynh yn syde nan sah, ccungccaw hoylei hae paw nynh yn dee nan hae sah.

¹² Ccungccaw hoylei hae paw tuh tuin kya maw a khuliakuh hae; khuliasaku athua hae keiccuze, thokuh kho vae khyh hae.