The Psalms 34 - Zotung Bible 2016

Luesahnaw keiccuze Thehoysahnaw

¹ Bawipaw kha accyh takyh kya ka thehoysah cih; amaw thehoysahnaw kha ka mung te po ka ho cih.

² Ka muisaw tuh Bawipaw liate a pookuh; zakawsangsakuh hae paw nynh thae hae sah lah, mih lungtua sah.

³ Kamaw ryte Bawipaw kha thehoysah oh sih lah, a min kha pynkheihlan hangthung oh sih.

⁴ Bawipaw kha ka ccung zah yn leihru, ka rinaw balyn kyate yn luesah.

⁵ Amaw kha do oh lah, awnaw na mue cih oh; maethyanaw kharouh na mue lan khyh oh.

⁶ E anyaapaw ccungccaw nynh a siapaw roi kha Bawipaw nynh thaepah zah, vawsawnaw miakaw kyate a khum.

⁷ Bawipaw raw a rih hae paw mih pepan khe a vaaw ccungccapaw nynh po voilu lan umnua hae zah minmin kha a luesah hae.

⁸ Bawipaw a hoynaw kha taangtua oh lah, nytua oh; amaw kya a rekuh hae paw tuh lungtuapaw nynh thua hae.

⁹ Pou a mithyaa hae nanning, Bawipaw kha rih oh, pawccecize amaw a rih hae paw tuh hobounaw hoi khyh hae.

¹⁰ Chindeih ano hae paw tuh hobounaw hoi hae zah mih vuelaw, thuasalama Bawipaw a ccung hae paw tuh uccaw hoypaw pawpaw mah hobou khyh hae.

¹¹ Pou imua hae, rang oh lah, ka bya hynh ngaetua oh; Bawipaw rawrinaw kha kae ccangpah cih oh.

¹² Hummou hiinnaw kha ry zah, hiinhoyte she saenaw kha a duaa?

¹³ Na lae kha hoyleinaw kyate la sungkuh lah, na mung kha hynbya honaw kyate la sungkuh.

¹⁴ Hoyleinaw kha cciataw lah, hoynaw kha raetua; daenaw kha ccung lah, deehui tua.

¹⁵ Bawipaw nynh miding hae kha do-oih hae zah, a siaruanaw hae kha a ngaepya hae.

¹⁶ Bawipaw nynh hoyleinaw a raetu hae kha rawse hae zah, minmin liathuinaw kha laephi kyate zosah khylan a maemih hae.

¹⁷ Miding hae nynh bawmnaw mue khylan a sia hae ze, Bawipaw nynh thaepah hae zah, mih vawsawnaw balyn kyate a luesah hae.

¹⁸ Bawipaw tuh thinlung a koipaw kalan naekuh zah, ngaehoinaw a hoi lei hae paw kha a khum hae.

¹⁹ Miding tuh vawsawnaw patae a teing, thuasalama Bawipaw nynh khah-e vawsawnaw balyn kyate a luesah.

²⁰ Bawipaw nynh a ru balyn kha a do-oih; a ru ccangkheit sanmah khya lan khyh.

²¹ Hoyleinaw nynh ccungccaw hoyleipaw hanlan chinaw kha a thuakhaepya, miding kha a huapaw ccungccaw tuh detahnaw a mue cih.

²² Bawipaw nynh a ryalahtu hae hiinnaw kha a shawkhaw hae; amaw kya a rekuhpaw tuh seibenaw mue lan khyh.