The Psalms 29 - Zotung Bible 2016

Khise kya Bawipaw Roi

David Hlaw

¹ Pou vaawccungccaw hae, Bawipaw kha thehoysah oh, a phu-enaw te a lesaenaw kha thehoysah oh.

² Bawipaw a min phu-enaw kha thehoysah oh; athyaapaw ccaannaw khate Bawipaw kha beik oh.

³ Bawipaw roi tuh rili vawlan khe accae; phu-enaw Pachia tuh kholung hawte thyh zah, Bawipaw tuh myarya lungpaw tui vawlan khe a um.

⁴ Bawipaw roi tuh huhan a hoi; Bawipaw roi tuh lesaenaw te phe abeih.

⁵ Bawipaw roi nynh sidar thingku hae kha a khya. Bawipaw nynh Lebanon e sidar ku hae kha a khya.

⁶ Lebanon mua kha vaetuataw hawte thohsakuh zah, Sirion kha anopaw ccungtepaw hawte a thohsaku.

⁷ Bawipaw roi nynh maeesoi kha a awsah.

⁸ Bawipaw roi nynh ramkaw kha a hysah; Bawipaw nynh Kadesh ramkaw kha a hysah.

⁹ Bawipaw roi nynh sazuh pinung kha ataw a thansah, thingnaw kha a khuasaku; te a beikinn kyakhe ccungccaw hae balyn nynh, “Phu-e sah!” a ci hae.

¹⁰ Bawipaw tuh tuileih vawlan khe a haung; Bawipaw tuh siapharan lante zungzae a haung.

¹¹ Bawipaw nynh a ccungccaw hae kha thawzung pya vae hae sah! Bawipaw nynh a ccungccaw hae kha daenaw te hythuapya vae hae sah!