The Psalms 27 - Zotung Bible 2016

Thehoysahnaw Hlaw

David Hlaw

¹ Bawipaw tuh ka awnaw te kae yn khumtu nynh thua; Hum raw mou ka rih cih? Bawipaw tuh ka hiinnaw a rekunaw nynh thua; Hummou ka ripah cih?

² Kae yn rawsepaw rhaw hae, ccungccaw hoylei hae paw nynh ka ngesaw kha ae lan he yn rawse hae tuh, thykuh hae zah a khuliakuh hae.

³ Rhawkaw phu nynh kae kha rawsete yn sannua hae zemah, ka thinlung tuh rih lan khyh; kae kha rawsete rhaw a tho hae zemah, zynkunaw ka hoi cih.

⁴ Bawipaw kha uccaw ccangkheit ka ngiaku, tuh-e tuh ka ccungkuh ung cih: tuh-e tuh ka hiin lungkhu balyn Bawipaw inn kya um khylan, Bawipaw puithyanaw muih khylan te amaw rynaw ccung khylan nynh thua.

⁵ Pawccecize vawsaw ccyh lyakhe, kae kha a bu kya yn resakuh cih; a beikinn lungkhu kya yn resaku; lungpi ahangnaw vawlan yn khang.

⁶ Atu ka pepan umpaw ka rhaw hae luki langkhe ka lu kha yn hangthung, lungtuanaw roisawte beikinn kya silawnaw ka rae cih; hlaw ka sah cih zah, Bawipaw kalan thehoysahnaw hlaw ka sah cih.

⁷ Pou Bawipaw , ka siapaw roi kha yn thaepya tua, thaw yn ccih lah, yn leihtua!

⁸ “Rang lah, Bawipaw mae kha ccungtua!” cite he na ho te, kae nynh, “Bawipaw , na mae kha kae ccung cih,” ka ci.

⁹ Na mae kha yn retawkuh nan. Na ryalahtu hynh thinriate yn maeleihtawkuh nan, nang tuh yn bawmtu nynh na thua. Pou yn khumtu Pachia, yn cciataw nan lah, yn vua nan.

¹⁰ Ka nung te ka paaw nynh phe yn vua hae zemah, Bawipaw nynh yn hoeikuh cih.

¹¹ Bawipaw , na laanpi kha yn ccangpya tua; ka rhaw hae keiccuze alawpaw laanpi kyakhe yn cciakhae tua.

¹² Ahme leipaw ccaekia hae nynh rawsete yn thonuakuh hae zah, huakunaw hy kha thawte a sue hae keiccuze ka rhaw hae rynaw kalan yn ap nan.

¹³ A hiin hae paw ram kyakhe Bawipaw hoynaw kha ka muih cih cite ka zyn.

¹⁴ Bawipaw kha ngaehoikuh oh; nae thawsaesakuh oh lah, rawthungnaw thinlung hoi oh; Bawipaw kha ngaehoikuh oh!