The Psalms 26 - Zotung Bible 2016

Ccungccaw Hoypaw Sawsangnaw

David Hlaw

¹ Pou Bawipaw , dingnaw laanpi kha ka zui zah, Bawipaw kha ka thinlung balyn te ka doliaku keiccuze, seinaw hoi leipaw ka thuanaw kha langsahpya tua hae.

² Pou Bawipaw , kae hynh yn veitua lah, yn syntawtua; ka thinlung te ka tuanaw hynh yn do mamiatua.

³ Atynpaw na sungsahnaw kha tyty ka ccykekuh zah, na lungzinaw kyakhe ka cceih.

⁴ Ccungkia lei hae paw ryte kae dahungkheih khyh zah, a thyaruh hae paw ryte kae ccuepekuh khyh.

⁵ Hoyleinaw a rae hae paw phu kha ka hua zah, ccungccaw hoylei hae paw ryte kae mungkuh khyh.

⁶ Pou Bawipaw , seinaw ka hoi khyhpaw kha langsaku khylan ka kuih ka singkuh zah, na silawhang pepan khe ka cceih,

⁷ Lungtuanaw hlaw kha accae lante ka sah zah, ngaeang lan umpaw na cyipaw balyn kha ka ho.

⁸ Pou Bawipaw , na umnaw inn te na phu-enaw a umnaw hmin kha ka ry.

⁹ Misei hae ryte yn rohkheih nan lah, ccungccaw a theih hae paw ryte ka hiinnaw hynh yn rohkheih nan,

¹⁰ mih kuih tuh ahoy leipaw cyinawpaw lang mang hae zah, mih ranglang kuih tuh pyaruh te phe abeih.

¹¹ Thuasalama kae tuh, dingnaw laanpi kha ka zui; kae kha yn shawkhaw lah, thaw yn ccih.

¹² Ka ccu tuh bialae khe ka thadyn zah, zapi pumkunaw kyakhe Bawipaw kha ka thehoysah.