The Psalms 25 - Zotung Bible 2016

Luenaw hanlan Sawsangnaw

David Hlaw

¹ Pou Bawipaw , na kalan saw ka sang.

² Pou ka Pachia, nang kae doliaku; maethyanaw yn muesah nan; ka rhaw hae kha ka tungvaw mih lungtuasah nan hae.

³ Nang ae ngaehoikuh hae paw tuh maethyanaw mue nan hae sah; akonglang um leite lungzi lei hae paw tuh maethyanaw mue hae sah.

⁴ Pou Bawipaw , na laanpi kha yn nysah tua; na laanpi kha yn ccangpya tua.

⁵ Nang tuh yn khumtu na thua zah, anin ninlang kae ngaehoiku keiccuze na byaccing thyhte yn cciakhae lah, yn ccangpya tua.

⁶ Pou Bawipaw , langmawpi te na langsaku vae paw na thawccinaw te atynpaw na sungsahnaw kha tuathui tua.

⁷ Ka di lya-e ka seinaw te ka cyiseimenaw kha liathui nan vae, Pou Bawipaw , nang tuh na hoy zah, atynpaw na sungsahnaw liate kae kha yn ning nan!

⁸ Bawipaw tuh hoy zah a ding; tukeiccuze misei hae kha a laanpi a ccangpya hae.

⁹ Zakawsangsakuh hae paw kha laan dingpaw kya cciakhae hae zah, zakawsangsakuh hae paw kha a laanpi a ccangpya hae.

¹⁰ Bawipaw laanpi balyn tuh a byakinnaw te a phunglang a zui hae paw hanlan atynpaw sungsahnaw te lungzinaw nynh thua.

¹¹ Pou Bawipaw , ka seinaw tuh myarya alung keiccuze, na min liate yn ngaethya.

¹² Bawipaw raw a rih hae paw tuh hum hae mou? Minmin nynh a poku lan hae paw laanpi kha a ccangpah cih hae.

¹³ Minmin tuh hiinhoyte a um cih hae zah, mih ccaaw hae nynh ram kha a ccou cih hae.

¹⁴ Bawipaw te vaeccawkunaw tuh amaw raw a rih hae paw hanlan thua zah, a byakinnaw kha a nysah hae.

¹⁵ Bawipaw kalan khe tyty ka do, pawccecize aning nynh ka ccu kha kaang kyate yn luesah cih.

¹⁶ Ka kalan yn hawi lah, thaw yn ccitua, pawccecize ka lanme zah, vawsawnaw yn pya hae.

¹⁷ Ka lungvawsawnaw hynh yn daesah lah, ka lungriathaenaw kyate yn luesah tua.

¹⁸ Ka teingnaw te ka vawsawnaw hynh yn tuapah lah, ka seinaw balyn kha yn ngaethya.

¹⁹ Ka rhaw hae tuh hohcihmou lung hae zah, hohcihmou yn hua hae cipaw tuatua.

²⁰ Ka hiinnaw hynh yn rin lah, yn khumtua; na kya ka reku keiccuze maethya yn lah nan.

²¹ Nang kha kae ngaehoiku keiccuze, hoynaw te dingnaw nynh yn thungkhaw vae sah.

²² Pou Pachia, Israel hae hynh mih vawsawnaw balyn kyate luesah tua hae.