The Psalms 24 - Zotung Bible 2016

Beikinn lungkhu lang Teenaw

David Hlaw

¹ Laephi te a lungkhu umpaw balyn tuh Bawipaw kya-e nynh thua, laephi te a vawlan a hiin hae paw balyn hynh amaw kya-e nynh thua,

² pawccecize laephi kha rili vawlan khe thadynsah zah, aleihpaw kha tui hae vawlan khe a tynsah.

³ Hummou Bawipaw mua vawlan a kae cih? Hummou amaw kya-e athyaapaw hmin kya a thadyn cih?

⁴ A kuih te a thinlung a thyaapaw, zohtuh a beik leipaw te hynhute bya a kinkuh leipaw nynh a kae cih zah a thadyn cih.

⁵ Aning nynh Bawipaw kyate hythuanaw kha thuasah, a khumtupaw Pachia kyate dingnaw kha thuasah a mue cih.

⁶ Tuhcihawpaw ccungccaw tuh Pachia a ccungpaw phu, Jakob Pachia mae kha a ccungpaw nynh thua.

⁷ Pou koikua hae, hungkuh oh! Pou zungzae a umpaw thuakaw hae, hungkuh oh! aphu-epaw Siapharan yn tee cih.

⁸ A phu-epaw Siapharan tuh hummou? A thawsaepaw te a thungpaw Bawipaw , rhawtuknaw kya athungpaw Bawipaw nynh thua.

⁹ Pou koikua hae, hungkuh oh! Pou zungzae a umpaw thuakaw hae, hungkuh oh! aphu-epaw Siapharan yn tee cih.

¹⁰ A phu-epaw Siapharan tuh hummou? Aning tuh vaaw Bawipaw , a phu-epaw Siapharan nynh thua.