The Psalms 23 - Zotung Bible 2016

Tuurinpaw Bawipaw

David Hlaw

¹ Bawipaw tuh ka tuurinpaw nynh thua, ka hobounaw um lan khyh.

² hinlalyhpaw ramno kya yn isah; ccirarihpaw tui aluanaw vaw kin khe yn cciakhae;

³ thawzung thawpaw kha yn pya. Amaw min hanlan ahmepaw laanpi kya yn cciakhae.

⁴ Amoh huaccepaw chinaw hunghua kya ka ccia zemah, vawsawnaw kha ka rih lan khyh; pawccecize nang nynh kae kha nae umkhae; na tungbang te na hoitang nynh ka ngae yn ngansah.

⁵ Ka rhaw hae malang khe ccaboi nae phaepya; ka lu kha chitui nae thuh; ka banang tuh phe aleikuh.

⁶ Ka hiin lungkhu balyn hoynaw te thawccinaw kha ka ccou cih zah, Bawipaw inn kya ka hiinshe balyn ka um cih.