The Psalms 22 - Zotung Bible 2016

Lue khylan Ngianaw

David Hlaw

¹ Ka Pachia, ka Pachia, pawcce phe nae vua? Kae kha bawm lanpaw kyate thuasah, ka siaruanaw roi kyate thuasah pawccemou asawnaw lang nae umtaw?

² Pou ka Pachia, khuadae ka sia zemah nae thaepah khyh; khuazi ka sia zemah lungdaenaw ka mue khyh.

³ Tuhzemah nang tuh Israel hae nynh ae thehoysahnaw hae kya na haung zah, athyaapaw nynh na thua.

⁴ Kae minpaaw hae nynh nang kha ae doliaku hae; nang kha ae doliakuh hae zah, na khum hae.

⁵ Na kalan sia hae zah, khumnaw a mue hae; nang kha ae doliakuh hae zah, maethyanaw mue khyh hae.

⁶ Thuasalama kae tuh ccungccaw thua leite tangkaria nynh ka thua; ming hae nynh a theihrya hae paw ka thua zah, ccungccaw hae nynh a dothatheih hae paw nynh ka thua.

⁷ Yn muihpaw balyn nynh yn sarya hae; mih mung yn sunua hae zah, mih lu yn henua hae;

⁸ “Aning tuh Bawipaw kha a doliaku; Bawipaw nynh khum vae sah, Bawipaw nynh a lungrythuapaw ccungccaw kha khum sah!” a ciku hae.

⁹ Tuhzemah ka nung vue kyate yn puisahpaw tuh nang nynh na thua; nosi ka thua lya khyndadyh lan nae do-oih.

¹⁰ Ka pui takaw te nang kha kae doliaku; ka pui takaw te nang tuh ka Pachia nynh na thua.

¹¹ Kae te beih sawkuh nan, vawsawnaw nynh yn naenuakuh zah, yn bawm lanpaw hum sanmah um khyh.

¹² Tangnuapaw hae patae nynh yn koihlu hae, Bashan ram e athungpaw tangnuapaw hae nynh yn koihlu hae;

¹³ A vue myarya law zah a siapaw chindeih hawte, mih khalang kha haehae yn awnua hae.

¹⁴ Kae kha tui hawte yn lae hae zah, ka ru balyn tuh pong suhliakuh; ka thinlung tuh khoilung hawte nynh thua; ka by lungkhu kya palae atui;

¹⁵ Ka thawzung tuh lae-ang akoinahpaw hawte karae rou zah, ka lae tuh ka dang kya phang bekuh; kae kha chinaw vuiping kya nae nung.

¹⁶ Ui hae nynh yn koihlu hae; Ccungccaw hoylei hae paw phu nynh kae kha yn koihlu hae. Ka kuih te ka ccu kha yn bou hae.

¹⁷ Ka ru balyn kha phe ka ria kho, Yn do hae zah mih lungrythuakhaekuh;

¹⁸ ka boeining kha neekuh hae zah, ka boeining kha ccungthykhyate a dung hae.

¹⁹ Thuasalama, pou Bawipaw , kae te beih sawkuh nan! Pou yn bawmtu, kae kha bawm khylan arangte beih yn cceih!

²⁰ Ka hiinnaw hynh thaloi kyate thuasah, e ui hae kyate thuasah yn khumtua!

²¹ Chindeih khalang kyate yn khumtua! Arepaw tangnuapaw ki kyate nae khum vae.

²² Na min kha ka uno hae kya ka hopah cih hae; a pumkuh hae paw ngaelung kya nang kha kae thehoysah cih:

²³ Bawipaw raw a rih hae paw, amaw kha thehoysah oh! Jakob ciihan hae balyn, amaw kha phu-esah oh; Israel ciihan hae balyn, amaw raw kha rih oh!

²⁴ Pawccecize vawsaw a tungpaw kya-e vawsawnaw kha pawlangria leite um khyh; tuh-e paw kyate a mae kha retawkuh khyh zah, amaw kalan he a sia ze a thaepya.

²⁵ A pumkuh hae paw zapi hae kyakhe kae thehoysah cih; namaw raw a rih hae paw malang khe bya ka kinkupaw kha ka ccingsah cih.

²⁶ Ryachi hae nynh a ae cih hae zah a byn cih hae; Bawipaw a ccung hae paw nynh amaw kha a thehoysah cih hae. Nae thinlung tuh zungzae a lungtua vae sah!

²⁷ Laephi adianaw kya a um hae paw balyn nynh a liathui cih hae zah, Bawipaw kalan a maeleihkuh cih hae; minphuin balyn nynh amaw kha a beik cih hae.

²⁸ Pawccecize uknaw tuh Bawipaw kya-e thua zah, amaw nynh minphuin balyn kha a uk hae.

²⁹ Laephi vawlan a hoirum hae paw balyn tuh a ae cih hae zah amaw kha a beik cih hae, laenoi kalang a cceihbung hae paw balyn tuh amaw malang a bakhung cih hae. Kae tuh amaw hanlan ka hiin cih.

³⁰ Ccaawsenopaw hae nynh amaw rya a la lah cih hae; malang she e ccungccaw hae kha Bawipaw kong hopya athua cih hae,

³¹ “Bawipaw nynh a ccungccaw hae kha a khum vae hae,” cite a pui loh leipaw ccungccaw hae kyakhe hopya athua cih hae.