The Psalms 2 - Zotung Bible 2016

Pachia nynh Popaw Siapharan

¹ Pawccemou minphuin hae nynh aruh lante doukunaw khuakhan hae zah, ccungccaw hae nynh accakaepaw kha a paccyn hae?

² Laephi siapharan hae te uktu bawi hae nynh Bawipaw te Bawipaw nynh chitui a thuhpaw kha rawsete pynkheihlan khuakhankuh hae zah,

³ “Oun heenaw hae paw kha thoh pae oh sih lah, mih liarui hae kha aening kyate vua oh sih,” a ciku hae.

⁴ Vaawram kya a haungpaw tuh a nuin; Bawipaw nynh minmin kha a sarya hae.

⁵ Oute thinriate minmin kha bya a hopah cih hae, a thinrianaw nynh mih thin a phangsah hae,

⁶ “Ka siapharan kha athyaapaw ka Zion mua vawlan ka nung vae,” a ci.

⁷ Bawipaw phunglang kha ka ho cih: Aning nynh kae kha, “Nang tuh ka ccapaw nynh na thua; atunin nang kha kae saah vae.

⁸ Yn ngiakuh lah, minphuin hae hynh na rho lang kae pya cih, laephi athangnaw cia na pee cih.

⁹ Minmin kha sivaw hoitang te na uk cih hae zah, laephi ang hawte zoihtatyh lan na koi cih hae,” yn cipya.

¹⁰ Pou siapharan hae, hawrarih lan umtua oh. Pou laephi uktu bawi hae, raeringnaw pyanaw hynh lawku tua oh.

¹¹ Bawipaw rya kha rawrinaw te lah oh lah, thyngkute

¹² a malang bakhung oh, tuhkhyhze tuh a thinria cih zah laanpi kya na roh cih oh; pawccecize a thinrianaw tuh maee lang palou arua. Amaw kya a rekuh hae paw balyn tuh lungtua hae paw nynh thua.