The Psalms 148 - Zotung Bible 2016Pachia Phu-enaw Thehoysah 1 Bawipaw kha thehoysah oh! Vaawlui kyate Bawipaw kha thehoysah oh; ahangnaw kyakhe amaw kha thehoysah oh! 2 Vaawccungccaw hae balyn, amaw kha thehoysah oh! a vaaw rhawkaw hae, amaw kha thehoysah oh! 3 Khuanin te sawpaw, amaw kha thehoysah oh; a awpaw awsi hae balyn nynh amaw kha thehoysah oh! 4 Ahang huaccepaw vaawlui te vaawlui luki e tui hae nanning, amaw kha thehoysah oh! 5 Minmin nynh Bawipaw min kha thehoysah hae sah, pawccecize aning nynh kawpya zah, minmin tuh rae athua hae. 6 Aning nynh minmin kha zungzae te zungzae cia tynsah hae zah, minmin nynh a kaw-ei kho khyh hae. 7 Laephi kyate Bawipaw kha thehoysah oh, rili ngasawpi hae te akhupaw rili balyn, 8 maee te hya, vuiraw te dangtui te a kawngaepaw khise! 9 Muapi hae te sangpyng hae balyn, thingku a thae hae paw te sidar ku hae balyn! 10 Loramsaw hae te sahiin hae balyn, avawthya hae paw te azouthyapaw pavaw hae! 11 Laephi siapharan hae te ccungccaw hae balyn, bawi hae te laephi uktu hae balyn! 12 Ccangvae hae te liaccaw hae, ataw hae paw te ano hae paw mah! 13 Minmin nynh Bawipaw min kha thehoysah hae sah, pawccecize amaw min rou nynh hangthung athua; a huhan tuh vaaw te lae laeze a hanghua. 14 Amaw nynh a ccungccaw hae ki kha a hangthung vae hae, lungzipaw a ccungccaw hae balyn, amaw te a naekuh hae paw Israel ccungccaw hae nynh amaw kha thehoysah oh. Bawipaw kha thehoysah oh! |
Zotung Bible © Bible Society of Myanmar, 2016.
Bible Society of Myanmar