The Psalms 146 - Zotung Bible 2016

Pachia Bawmnaw Thehoysah

¹ Bawipaw kha thehoysah oh! Pou ka muisaw, Bawipaw kha thehoysah!

² Ka hiin lungkhu balyn Bawipaw kha the ka hoysah cih; Ka hiin lungkhu balyn ka Pachia thehoysahnaw hlaw kha ka sah cih.

³ Bawi hae te ccungccaw hae kha doliakuh nan oh, minmin kya bawmnaw um khyh.

⁴ Mih hy he athang te, laephi kalan a ki hae; tuh-e nin ccaccei khe mih paccynkunaw tuh aroh.

⁵ Jakob Pachia kha bawmtu lang a hoi hae paw, Bawipaw mih Pachia kha a ngaehoikuh hae paw tuh lungtua hae paw nynh thua,

⁶ tuh-e Pachia tuh vaaw te lae, rili te tuh-e hae kya a umpaw balyn kha a raetu thua zah, zungzae a lungzipaw nynh thua,

⁷ aning tuh tuaasahkunaw a ing hae paw hanlan dingnaw a raepaw nynh thua; mih vuelaw hae paw kha looh a pya hae. Bawipaw nynh thongccah hae paw kha a luesah hae;

⁸ Bawipaw nynh mitmoh hae kha ngaw a muihsah hae. a nyaasah hae paw kha a hangthung hae; Bawipaw nynh miding hae kha a sungsah hae.

⁹ Bawipaw nynh mikhia hae kha a rin hae; ngawraw hae te nomae hae kha a bawm hae, thuasalama ccungccaw hoylei hae laanpi kha a ropya hae.

¹⁰ Pou Zion, na Pachia athuapaw Bawipaw nynh zungzae a uk cih, Bawipaw kha thehoysah oh!