The Psalms 142 - Zotung Bible 2016

Lue khylan Sawsangnaw

David Sawsangnaw

¹ Bawipaw kalan ka roisawte ka sia; Bawipaw kalan ka roisawte ka ngia.

² Ka lungccing leinaw kha amaw malang ka thuakhae; ka vawsawnaw kha amaw malang ka hopya.

³ Ka muisaw tuh a lungthaw he azya ze, ka ccianaw laanpi kha phe na ny. Ka ccianaw laanpi kyakhe kaang yn syakhaw vae hae.

⁴ Ka ranglang khe he ka do tuh, kae yn nyhpaw lu kheit san um khyh; ka hanlan khynnaw um vae khyh; humhung nynh mah kae kha yn oihsah vae khyh.

⁵ Pou Bawipaw , na kalan ka sia zah, “Nang tuh ka khynnaw nynh na thua, a hiin hae paw ram kyaze nang tuh ka hanpaw nynh na thua,” ka cipya.

⁶ Myarya nyaa lan zakawsangsah ka thua keiccuze ka siapaw hynh yn ngaepya tua. Yn tuaa yn sah hae paw kyate yn khumtua, pawccecize minmin tuh kamaw laeze myarya mih thawsae.

⁷ Na min kha the ka hoysah kho nawlan, thong kyate beih yn pousah. Ka tungvaw myarya na hoy keiccuze miding hae nynh kae kha yn koihlu cih hae.