The Psalms 14 - Zotung Bible 2016

Ccungccaw Hoyleinaw

(Sam 53)

¹ Mingaee hae nynh mih thinlung kya, “Pachia um khyh,” a ci hae. Minmin tuh a roh hae, anungsikuhpaw rya kha a law hae; ahoypaw a cyihpaw lu kheit sanmah um khyh hae.

² Ccungccaw hae kya a hawpaw te Pachia a ccungpaw lu kheit san a um tou, um khyh tou cipaw muih khylan Bawipaw nynh vaawlang te ccungccaw kha a dobung.

³ Ccungccaw balyn tuh a cceihsei vae hae, mih balyn mawte phe lokuh lante accouseikuh hae; ahoypaw a cyihpaw hum san um khyh, lu kheit san um khyh.

⁴ Sanlou ae hawte ka ccungccaw hae kha karyh ae hae zah, Bawipaw kalan saw a sang lei hae paw, hoyleinaw a cyih hae paw balyn nynh nythyanaw hoi khyh hae tou?

⁵ Te minmin tuh myaryamaw a rih cih hae, pawccecize Pachia tuh ading hae paw phu kya a um.

⁶ Nanning nynh ryachipaw a khuakhannaw kha maethya na lah oh salamah, Bawipaw tuh aning a khynnaw nynh thua.

⁷ Israel hae hanlan khumnaw tuh Zion kyate yn thua vae sah! Bawipaw nynh a ccungccaw hae kha hoynaw he a pyathui hae te, Jakob tuh a lungtua cih; Israel tuh a lungpaw cih.