The Psalms 139 - Zotung Bible 2016

Pachia nynh Marya A Ny

David Hlaw

¹ Pou Bawipaw , akaw-aleih nae do mamia zah nae ny vae.

² Ka haung ze thuasah, ka thoku ze thuasah phe nae ny; ka tuanaw kha asawnaw kyate phe na ny.

³ Ka ccianaw laanpi te ka inaw kha akaw-aleih phe na muih zah, ka cyisahnaw balyn kha marya na ny.

⁴ Bya kaw kheit san ka ho mawze, pou Bawipaw , ka ho lanpaw kha khaleih na ny.

⁵ Ka nulang ka malang te nae voilu zah, na kuih kha ka tungvaw na khang.

⁶ Tuhcihawpaw hawnaw tuh ka hanlan myaryasankae ngaeangthua lan a um; tuh-e tuh myarya hang zah ka phah kho khyh.

⁷ Na muisaw kyate lue khylan teilangmou ka cceih kho cih? Na umnaw kyate teilangmou ka ccue kho cih?

⁸ Vaawram lang ka kae ze, nang tuh tuin kya na um. Michi khua kya inaw ka raeku ze, nang tuh tuin kya na um.

⁹ Awkhua khuanin thuanaw nithua lang phe dianaw cia ka zou zah, niccaw lang e rili athangnaw kyakhe ka la um lanze,

¹⁰ tuin kya heize na kuih nynh yn cciakhae cih zah na ranglang kuih nynh tynkaring lan yn kyng cih.

¹¹ “Thanccingte mohnaw nynh kae kha yn bong cih zah, ka pepan umpaw awnaw tuh khuazi lang a tang cih,” cite ka ho lanze,

¹² mohnaw kha heize nang na hanlan tuh moh khyh; nang na hanlan mohnaw tuh awnaw te aloku keiccuze khuazi tuh khuadae hawte a aw.

¹³ Ka lungkhu e miakaw yn raetupaw tuh nang nynh na thua; ka nung vue lungkhu khe nae rae,

¹⁴ Ngaeangthua lante ri lan a um lante nae rae keiccuze kae thehoysah. Na ryalaw balyn tuh ngaeangthua lan a um cipaw hoyte ka ny.

¹⁵ Kae kha alangku leinaw khe nae rae zah, laephi akhunaw kyakhe ccynmamyh lante he nae rae tuh, ka pyn tuh namaw kyate thuruh thua khyh.

¹⁶ Accing loh leipaw ka pyn kha phe na muih. Tuh-e hae ccangkheit san a um mawkhe, ka hanlan na raepaw nin hae balyn kha na ccauh kya zei athua vae.

¹⁷ Pou Pachia, na tuanaw tuh ka hanlan pawcih baban mou akhincci! Tuh-e na tuanaw balyn tuh pawcih baban mou ako!

¹⁸ Ria lan ka citua zah, laesia laeze alunghua; he ka thaekuh tuh, namaw kya mamin nynh ka um.

¹⁹ Pou Pachia, ccungccaw hoylei hae paw kha theih hae lah, ccungccaw chia a mang hae paw tuh ka kyate pou hae sah,

²⁰ minmin nynh na konglang kha ahoy lei lante ho hae zah, hoyleinaw hanlan nang kha rawsete mimaw te mimaw a hangsahku hae.

²¹ Pou Bawipaw , nang ae hua hae paw kha ka hua khyh hae tou? Nang ae dou hae paw kha a nungsikuh hae paw lang ka ria khyh hae tou?

²² Minmin kha ka thinlung balyn te ka hua hae zah, ka rhaw hae lang ka ria hae.

²³ Pou Pachia, akaw-aleih yn do mamia lah, ka thinlung kha nytua; yn syntawtua lah, ka tuanaw kha nytua.

²⁴ Ka lungkhu kya hoyleinaw a um tou um khyh tou cipaw yn do lah, zungzae tynpaw laanpi kya yn cciakhae tua.