The Psalms 132 - Zotung Bible 2016

Zion kya Zungzae Umpaw Pachia

Cciathungnaw Hlaw

¹ Pou Bawipaw , David te a teingpaw vawsawnaw balyn kha liathuitua;

² aning nynh Bawipaw kalan te Athungpaw Jakob Pachia kalan bya a kinkupaw kha liathuitua:

^3-5 “Bawipaw hanlan hmin san kheit, Athungpaw Jakob Pachia hanlan umnaw hmin san kheit kha ka muih mawlaezung, ka inn lungkhu lang ka tee lan khyh zah, ka ikhung vawlan ka kae lan khyh; ka mit kha ka isah lan khyh zah, ka mit-ving kha masite ka isah lan khyh,” a ci.

⁶ Byakin thingkua kong kha Efrathah ram kya kae thae zah, Jaar loo kyakhe tuh-e tuh kae muih.

⁷ “A umnaw hmin kalan cceih oh sih lah, a ccu a khangnawpaw kyakhe beik oh sih,” kae ci.

⁸ Pou Bawipaw , thokuh lah, na huhan a umnahpaw byakin thingkua rykhate na umnaw hmin kalan cciatua.

⁹ Na ranpibawi hae nynh dingnaw boeining kha lawkuh hae sah lah, alungzipaw na ccungccaw hae nynh lungtuate sia hae sah.

¹⁰ Na seepaw David kha tuate, na kya-e chitui thuh athuapaw na ccungccapaw kha vua nan.

¹¹ Bawipaw nynh David kyakhe phe atynpaw byakinkunaw kha rae zah, tuh-e byakinnaw kha roh lan khyh: “Na ccapaw hae laku e lu kheit kha na bawitungkhung vawlan ka nung cih.

¹² Na ccapaw hae nynh ka byakin te ka ccangpah cih hae paw ka phunglang hae kha a zui hae ze, mih ccapaw hae nynh mah na bawitungkhung vawlan zungzae a haung cih hae,” na la ci.

¹³ Pawccecize Bawipaw nynh Zion kha a po vae; tuh-e tuh a umnaw lang a ry vae.

¹⁴ “E hynh zungzae ka umnaw hmin nynh thua; e hynh ka ry vae keiccuze, e kya ka um cih.

¹⁵ Zion a looh kha hythuanaw patae ka pya cih; a ccungccaw ryachi hae kha looh phe byn lan ka pya cih hae.

¹⁶ A ranpibawi hae kha khumnaw boeining ka lawsakuh cih hae zah, alungzipaw a ccungccaw hae nynh lungtuate a sia cih hae.

¹⁷ Tuin kyakhe David ki kikheit kha ka toihsah cih; chitui thuh athuapaw ka ccungccaw hanlan maeekhua kha ka paccyn vae.

¹⁸ A rhaw hae kha thethya ka ccousah cih hae, thuasalama a bawilukhung tuh a tungvaw khe a aw cih.