The Psalms 118 - Zotung Bible 2016

Taenaw Hlaw

¹ Bawipaw tuh hoy zah a sungsahnaw tuh zungzae atyn keiccuze amaw kalan lungtuabya ho oh!

² Israel hae nynh, “A sungsahnaw tuh zungzae atyn,” cite ho hae sah.

³ Aaron ciihan hae nynh, “A sungsahnaw tuh zungzae atyn,” cite ho hae sah.

⁴ Bawipaw rawrih hae paw nynh, “A sungsahnaw tuh zungzae atyn,” cite ho hae sah.

⁵ Ka riathaenaw kyate Bawipaw kha ka ko; Bawipaw nynh yn leih zah, akonaw hmin kyakhe yn nung.

⁶ Bawipaw nynh yn pankhae keiccuze ka rih khyh. Ccungccaw nynh ka tungvaw pawmou yn cyih kho cih?

⁷ Bawipaw nynh kae kha bawm khylan yn pankhae; Kae yn hua hae paw tuh a shung hae paw kha ka muih cih.

⁸ Ccungccaw doliaku laeze Bawipaw doliaku tuh ahoyhua.

⁹ Laephi bawi doliaku laeze Bawipaw doliaku tuh ahoyhua.

¹⁰ Minphuin balyn nynh yn koihlu hae; thuasalama Bawipaw min te minmin kha ka ro hae!

¹¹ Minmin nynh yn koihlu hae, teitei lang balyn te pong yn koihlu hae; thuasalama Bawipaw min te minmin kha ka ro hae!

¹² Minmin nynh khoi hawte yn lungnuaku hae; hinpaw a upaw maee hawte minmin tuh a u hae. Bawipaw min te minmin kha ka ro hae!

¹³ Ka khuliaku ccaw cite thawte yn tu hae, thuasalama Bawipaw nynh yn bawm.

¹⁴ Bawipaw tuh ka thawzung te ka thungnaw thua zah, yn khumtu lang a tang vae.

¹⁵ Miding hae bu kya taenaw lungtuanaw hlawsah hae paw roi accae: “Bawipaw a ranglang kuih nynh rawthungte rya a law;

¹⁶ Bawipaw a ranglang kuih tuh hangthung athua; Bawipaw a ranglang kuih nynh rawthungte rya a law,” a ci hae.

¹⁷ Ka chih lan khyh, ka hiin cih zah, Bawipaw ryalawnaw kha ka siakhae cih.

¹⁸ Bawipaw nynh myarya ccih lan de yn tah vae, thuasalama yn chisah khyh.

¹⁹ Dingnaw koikua kha yn hungpah oh; tuin kyate ka tee cih zah, Bawipaw kalan lungtuabya ka ho cih.

²⁰ E hynh Bawipaw koikua nynh thua; miding hae nynh tuin kya a tee cih hae.

²¹ Nang nynh nae leih zah, nae khum vae keiccuze na tungvaw ka lungtua.

²² Inn sak hae paw nynh a nuee hae paw lung tuh apaki lang e abyapi huapaw lung lang yn tang.

²³ E hynh Bawipaw ryalawnaw nynh thua; aening mit kya ngaeangthua lan umpaw nynh thua.

²⁴ E nin hynh Bawipaw nynh a raepaw nin nynh thua; e nin kyahin lungtua lungpawte um oh sih.

²⁵ Pou Bawipaw , kaening hynh beih oun khum cite kae ngiaku! Pou Bawipaw , kaening hynh kae laan kae sui beih uasah cite kae ngiaku!

²⁶ Bawipaw min te yn thuapaw tuh hythuanaw mue vae sah. Bawipaw inn kyate kaening nynh hythuanaw kae pya hae.

²⁷ Bawipaw tuh Pachia thua zah, aning nynh awnaw kha oun pya vae. Nae kuih te thingnge kha ccyngkute poi kha tho oh lah, silawhang kha po koihlu oh.

²⁸ Nang tuh ka Pachia na thua zah, na kalan lungtuabya ka ho cih; ka Pachia na thua zah, kae thehoysah cih.

²⁹ Bawipaw lungtuabya ho oh, pawccecize aning tuh hoy zah a sungsahnaw tuh zungzae atyn.