The Psalms 115 - Zotung Bible 2016

Pachia Lesaenaw

¹ Kaening hanlan thua leite, pou Bawipaw , kaening hanlan thua leite, atynpaw na sungsahnaw te na lungzinaw keiccuze na min phu-e pya nawlan thua vae sah.

² “Mih Pachia tuh teimou a um?” cite minphuin ccangpaw hae nynh pawccemou a ho cih hae?

³ Ah Pachia tuh vaawram kya a um; a lungry thyhte a cyi.

⁴ Mih zohtuh hae tuh sui te ngun thua zah, ccungccaw kuih te raepaw nynh athua hae.

⁵ Tuh-e zohtuh hae tuh mung hoi hae salamah, byaho kho khyh hae; mit hoi hae salamah ngawmuih khyh hae.

⁶ Nakaring hoi hae salamah nawthae khyh hae; naduh hoi hae salamah amyn thae khyh hae.

⁷ Kuih hoi hae salamah haethya khyh hae; ccu hoi hae salamah cceihthya khyh hae; mih lohtharue te roi pousathya khyh hae.

⁸ E zohtuh a raetu hae hynh zohtuh hae mawte nynh a loku hae; e zohtuh hae a doliakuhpaw balyn tuh tuhcite nynh athua hae.

⁹ Pou Israel, Bawipaw kha doliakuh! Aning tuh minmin bawmtu te thungkhawtu nynh thua.

¹⁰ Pou Aaron ciihan hae, Bawipaw kha doliakuh oh! Aning tuh minmin bawmtu te thungkhawtu nynh thua.

¹¹ Bawipaw rawrih hae paw nanning, Bawipaw kha doliakuh oh! Aning tuh minmin bawmtu te thungkhawtu nynh thua.

¹² Bawipaw nynh aening kha oun ning khyh zah, hythua oun pya cih; Israel ciihan kha hythua a pya cih; Aaron ciihan kha hythua a pya cih;

¹³ Bawipaw rawrih hae paw adih ale kha hythua a pya cih hae.

¹⁴ Bawipaw nynh nanning te nae ccaaw hae kha pungzaenaw ae pya vae oh sah.

¹⁵ Vaaw te lae a raetu Bawipaw nynh hythua ae pya vae oh sah.

¹⁶ Vaawlui tuh Bawipaw vaawlui nynh thua, thuasalama laephi tuh ccungccaw hae kalan a pya vae.

¹⁷ Michi hae, daenaw kalan a rungbung hae paw miakaw tuh Bawipaw kha thehoysah khyh hae.

¹⁸ Thuasalama aening nynh Bawipaw kha atu te zungzae cia the ah hoysah cih oh. Bawipaw kha thehoysah oh!