The Psalms 107 - Zotung Bible 2016

UK 5 ( Sam 107—150 ) Pachia Hoynaw Thehoysahnaw

¹ Bawipaw tuh ahoy keiccuze amaw kalan lungtuabya ho oh; pawccecize atynpaw a sungsahnaw tuh zungzae atyn.

^2-3 Vawsawnaw kyate khum thua hae zah, nithua, niccaw, thahlang, deilang umpaw ram hae kyate a suelua hae paw, Bawipaw nynh a khum hae paw kha nynh tuh-e bya tuh buabua ho hae sah.

⁴ Ccungccaw abang tuh umnaw lanpaw khua kalan a cceihpaw laanpi kha muihku leite, ccungccaw um leinaw laesia ram kyakhe a khiavuikuh hae;

⁵ mih vuelaw, mih tuihaw zah, mih lungthaw athang.

⁶ Tetuh mih vawsawnaw kyate Bawipaw kalan sia hae zah, aning nynh mih riathaenaw kyate a luesah hae;

⁷ a um nawlan hae paw khua kya a thua mawlaezung hae, alawpaw laanpi kyate a cciakhae hae.

⁸ Atynpaw a sungsahnaw te ccungccaw hae kya a raepaw ngaeangnaw hae keiccuze minmin nynh Bawipaw kalan lungtuabya ho hae sah.

⁹ Pawccecize tui a hawpaw kha a tuihawkesah hae zah, a vuelawpaw kha ahoypaw uccaw te a vue a sosah.

¹⁰ Ccungccaw abang tuh ngaethyate mohnaw kya a haung hae, vawsaw teingte sivawrui te hekute thongccah hae paw a um,

¹¹ pawccecize minmin nynh Pachia bya kha rawsete dou hae zah, Ahang Huaccepaw kya-e tuanaw pyakunaw kha pawlangria khyh hae.

¹² Ryalaw arupaw khate mih lung a thangsah hae, khuliakuh hae zah, a thotu te a bawmtu lu kheit san um khyh.

¹³ Tetuh mih vawsawnaw kyate Bawipaw kalan sia hae zah, aning nynh mih riathaenaw kyate a khum hae;

¹⁴ mohnaw te lungthangnaw kyate minmin kha poh thuaa hae zah, a heenaw hae paw kha a paepya hae.

¹⁵ Atynpaw a sungsahnaw te ccungccaw hae kya a raepaw ngaeangnaw hae keiccuze Bawipaw kalan lungtuabya ho hae sah.

¹⁶ Pawccecize sohin thuakaw kha khya zah, sivaccaw hae kha ccangning lang a khya hae.

¹⁷ Abang tuh seinaw laanpi a zuinaw hae kya a ngaeekhaekuh hae, mih hoyleinaw keiccuze riathaenaw a teing hae;

¹⁸ Looh phuin miakaw kha ry khyh hae zah, chinaw koikua kalan a naekuh hae.

¹⁹ Tetuh mih vawsawnaw kyate Bawipaw kalan sia hae zah, aning nynh mih riathaenaw kyate a khum hae;

²⁰ a bya kha sawnua hae zah a dansah hae, te ronaw kyate a khum hae.

²¹ Atynpaw a sungsahnaw te ccungccaw hae kya a raepaw ngaeangnaw hae keiccuze Bawipaw kalan lungtuabya ho hae sah.

²² Lungtua silawnaw rae hae sah lah, lungtuanaw hlawsahte a cyipaw kha ho hae sah.

²³ Abang tuh sanphalung ccikute rili vawlan cceih hae zah, tui vawlan khe vuekuakunaw rya a lawkuh hae;

²⁴ minmin nynh Bawipaw ryalawnaw te tui akhupaw kya ngaeangthua lan umpaw a ryalawnaw hae kha a muih hae.

²⁵ Kawpya zah khise atho keiccuze tuileih atho.

²⁶ Sanphalung tuh vaawlui langkhe hangkuh zah akhunaw langkhe a ccahbung; ccungccaw hae tuh mih vawsaw keiccuze mih lung athang;

²⁷ Aruipaw hawte tangkitangkae lante cceih hae zah, a khuliakuh hae, mih nythyanaw balyn tuh phe thang.

²⁸ Tetuh mih vawsawnaw kyate Bawipaw kalan sia hae zah, aning nynh mih riathaenaw kyate poh a thuaa hae;

²⁹ khise kha daesah zah, rili tuileih tuh zya adae.

³⁰ Tuhcite zya adae keiccuze mih lungtua zah, a ccia rynaw hae sanphalung thadynnaw hmin kalan a thuakhae hae.

³¹ Atynpaw a sungsahnaw te ccungccaw hae kya a raepaw ngaeangnaw hae keiccuze minmin nynh Bawipaw kalan lungtuabya ho hae sah.

³² Ccungccaw zapi pumkunaw kyakhe Bawipaw kha hangthung hae sah lah, piccan hae tungkunaw kyakhe amaw kha thehoysah hae sah.

³³ Vawkhu hae kha laesia ram lang tangsah zah, tuidy aphyhnaw kha mah ram roupaw lang a tangsah,

³⁴ Ram hoypaw kya a um hae paw mih hoyleinaw keiccuze tuh-e ram tuh loi-epaw laethya ram lang a tangsah.

³⁵ Laesia ram kha tuili lang tangsah zah, ram roupaw kha tuidy aphyhnaw lang a tangsah.

³⁶ Te tuin kyakhe mih vuelawpaw kha umsah hae zah, minmin nynh um nawlan khuapi a raeku hae;

³⁷ Loo kya ccacii tuu hae zah, misu khokhu khe misu ku kha a lin hae, looh patae a voisah hae.

³⁸ A hythuanaw liate minmin tuh patae pungzae hae zah, mih sahiin kha mah zyasah bung khyh.

³⁹ Minmin tuh tuaasahkunaw, vawsawnaw te ngaethyanaw keiccuze zyabung hae zah he a nyaabung hae te,

⁴⁰ aning nynh uktu hae kha maethyabong hae zah, laanpi um leinaw ramkaw khe a khiavuisaku hae;

⁴¹ thuasalama ryachi hae kha riathaenaw kyate luesah hae zah, mih innbyn hae kha tuuphu hawte a pungzaesah hae.

⁴² Miding hae nynh tuh-e tuh muih hae zah, mih lungtua, hoyleinaw balyn nynh a khalang kha a huku.

⁴³ A haw hae paw nynh e uccaw hae hynh peki hae sah lah, Bawipaw sungsahnaw atynpaw kha tua hae sah.