The Psalms 106 - Zotung Bible 2016

Israel Seinaw Phykunaw

¹ Bawipaw kha thehoysah oh! Bawipaw tuh hoy zah, a sungsahnaw tuh zungzae atyn keiccuze amaw kalan lungtuabya ho oh.

² Bawipaw nynh a cyipaw alesaepaw balyn kha hum nynh mou a ho kho cih? Hum nynh mou a thehoynaw balyn kha a ho kho cih?

³ Byading kha zui zah, dingnaw kha zungzae a raepaw tuh lungtuapaw nynh thua.

⁴ Pou Bawipaw , na ccungccaw hae kya maehoynaw he na langsakuh te, kae kha yn liathuitua; minmin kha he na luesah hae te, kae mah yn bawmbua;

⁵ na po hae paw kya hoynaw kha ka muih nawlan, na minphuin a lungtuanaw kya ka lungtuabua nawlan, te na rho athua hae paw kya ka lungtuabua nawlan kae kha yn liathuitua.

⁶ Kaening te kae minpaaw hae tuh kae sei vae; hoyleinaw kha kae rae vae; ahoy lei lante kae cyi vae.

⁷ Kae minpaaw hae Izip ram kya a la um lya hae ze ngaeang lan umpaw na ryalawnaw hae kha tuathyanaw la hoi khyh hae; myarya lepaw atynpaw na sungsahnaw kha la liathui khyh hae, Rili Se kyakhe Ahang Huaccepaw kha a dou hae.

⁸ Tuhzemah alesaepaw a huhan kha langsah khylan, amaw min hanlan minmin kha a khum hae.

⁹ Rili Se kha kawpya zah karae arou; laerou kya cciakhae hawte akhupaw kya po a cciakhae hae.

¹⁰ Tuhcite minmin kha mih rhaw hae kuih kyate khum hae zah, rhaw hae kuih kyate a luesah hae.

¹¹ Mih rhaw hae kha tui nynh marya vu hae zah, lu kheit sanmah lue khyh hae.

¹² Tetuh minmin nynh amaw bya kha zyn hae zah, a thehoysahnaw hlaw kha a sah hae.

¹³ Thuasalama aro mawkhe a bya kha a ning hae; amaw kya-e tuanaw pyakunaw kha ngaehoikuh khyh hae.

¹⁴ Ramkaw khe ryduaanaw myaryamaw hoi hae zah, laesia ram kya Pachia kha a syntawtua hae;

¹⁵ minmin nynh a ngia hae paw kha aning nynh a pya hae, thuasalama ri lan umpaw ccinaw kha a sawnua hae.

¹⁶ Minmin nynh ryahmin kyakhe Moses tungvaw te Bawipaw kya-e athyaapaw Aaron tungvaw kya eiungnaw a hoi hae.

¹⁷ Laephi nynh haehae ua zah Dathan kha po a laang, Abiram te a innbyn hae kha pong a thei hae.

¹⁸ Minmin a zui hae paw kyakhe maee-u zah, maeesoi nynh ccungccaw hoylei hae paw kha phe a u hae.

¹⁹ Minmin nynh Horeb kyakhe vaetuataw kha raekuh hae zah, a laeeku hae paw zohtuh kha a beik hae.

²⁰ Pachia phu-enaw kha lonua a aepaw vaetua zuh lang a rulae hae.

²¹ Minmin nynh mih Khumtu athuapaw Pachia kha a ning hae; aning tuh Izip ram kya myarya lepaw uccaw hae a raetupaw thua zah,

²² Ham ram kya ngaeang lan umpaw uccaw a raetupaw te, Rili Se kya ri lan umpaw uccaw a raetupaw nynh thua.

²³ Tukeiccuze Pachia nynh minmin kha ka roh cih hae a ci; tuhzemah a popaw Moses nynh Pachia malang thadyn zah, minmin kha a ro khyh nawlan hae Pachia thinrianaw kha a daesah.

²⁴ Oute minmin nynh ram hoypaw kha pawlangria khyh hae zah, a byakinnaw kha zyn khyh hae.

²⁵ Mih bu kyakhe ccohkuh hae zah, Bawipaw bya kha ngae khyh hae.

²⁶ Tukeiccuze a kuih kha hang zah, “Minmin hynh ramkaw kya ka khulia cih hae,

²⁷ mih ciihan hae kha minphuin ccangpaw hae laku kya ka zosah cih hae zah, ccangpaw ram hae kya phiariphiarae ka nung cih hae,” cite minmin kya bya a kinku.

²⁸ Tetuh minmin nynh Peor kya umpaw Baal pachia kha beikbua hae zah, achihpaw kalan a pya hae paw silawnawpaw kha a aebua hae;

²⁹ mih cyisahnaw te Bawipaw kha thinriasah hae zah, ccinaw alepaw kha minmin kya a pousah.

³⁰ Oute Finehas nynh thadyn zah bya a pia keiccuze ccinaw alepaw tuh phe adae.

³¹ Tuh-e tuh Finehas a dingnaw lang she takyh kya zungzae riapya athua.

³² Minmin nynh Meribah tui kyakhe Bawipaw kha a thinriasah hae zah, minmin keiccuze Moses tuh vawsawnaw a tung;

³³ Moses kha myaryamaw a thin a riasah hae keiccuze, aning nynh ho lan accan leipaw cia kha phe a ho.

³⁴ Bawipaw nynh kaw a pya hae thyhte, minmin nynh minphuin ccangpaw hae kha roh khyh hae,

³⁵ tuh-e minphuin hae ryte pykuh hae zah, tuh-e hae nynh a cyi hae hawte cyi lan a ccangku hae.

³⁶ Minmin nynh mimaw hanlan kaang lang atangpaw mih zohtuh hae kha a beik hae.

³⁷ Mih ccanung hae te mih ccapaw hae khate raerangsaro hae kha si a law hae;

³⁸ seinaw a hoi leipaw chiise, mih ccanung hae te mih ccapaw hae chiise khate Kanaan zohtuh hae kha si a law hae, tuh-e ram tuh chiise te a nungsikuh.

³⁹ Tuhcite mih cyisahnaw keiccuze athyaa leipaw lang a tang hae, mih cyisahnaw kya a ohhuaku hae.

⁴⁰ Tetuh Bawipaw thinrianaw tuh a ccungccaw hae tungvaw maee lang rua zah, a rho kha a hua vae;

⁴¹ minmin a huatu hae nynh minmin kha uk khylan minphuin ccangpaw hae kuih kalan a pya hae.

⁴² Mih rhaw hae nynh minmin kha tuaasah hae zah, mih rhaw hae kuihkaw khe nung athua hae.

⁴³ Minmin kha avae patae a luesah hae, thuasalama minmin nynh mih rynaw kyakhe amaw kha a dou hae, te mih hoyleinaw keiccuze nyaasah athua hae.

⁴⁴ Tuhzemah mih siaruanaw kha he a thaepah hae te, mih riathaenaw kha pe a kipya hae.

⁴⁵ Minmin hanlan a byakinnaw kha liathui zah, atynpaw a sungsahnaw alepaw liate ngaethyaumsahnaw kha a langsaku.

⁴⁶ Minmin a kyngtu hae paw balyn kyakhe ngaethyaumsahnaw a hoisah hae.

⁴⁷ Pou Bawipaw kae Pachia, kaening hynh oun khumtua, minphuin ccangpaw hae laku kyate oun sueluatua, tuhteze nynh athyaapaw na min te namaw thehoysahnaw kya phu-enaw kha lungtuabya kae ho cih.

⁴⁸ Israel Pachia Bawipaw kha zungzae te zungzae cia thehoysah oh. Ccungccaw balyn nynh, “Amen” ci hae sah. Bawipaw kha thehoysah oh!