The Psalms 105 - Zotung Bible 2016

Israel hanlan Pachia Lungzinaw

¹ Bawipaw kalan lungtuabya ho oh, a min kha ko oh lah, a cyipaw kha ccungccaw hae nysah oh.

² Amaw kalan hlawsah oh, thehoysahnaw hlawsah oh; ngaeangthua lan umpaw a ryalaw balyn kha ho oh.

³ A min thyaapaw kha phu-esah oh; Bawipaw a ccung hae paw thinlung tuh a lungtua sah.

⁴ Bawipaw te a thawzung kha ccungtua; a mitmae kha ccung zungzae oh.

^5-6 Pou a seepaw Abraham ciihan, a popaw Jakob ccaaw hae, ngaeang lan umpaw a la cyipaw, ngaeang lan umpaw a ryalaw hae te a hopaw byapianaw kha liathui oh.

⁷ Aning tuh Bawipaw ah Pachia nynh thua; a byapianaw tuh laephi pynpi hanlan nynh thua.

⁸ A byakinnaw kha zungzae peki zah, kaw a pyapaw kha she thong kheit cia ning khyh,

⁹ Abraham kya a raepaw byakinnaw, Isak kya a kinpyakupaw a byakinnaw,

¹⁰ Jakob kya phungbya lante tynsah zah, Israel kya zungzae tynpaw byakinnaw lante a tynsah,

¹¹ “Kanaan ram hynh rho lang kae pya cih,” a la cipaw kha a liathui.

¹² Minmin tuh milu beihtaraw kyalya cih hae zah, ramccang ccungccaw lang tangte

¹³ ram kheit kyate ram kheit kalan, pee kheit kyate ccangpaw pee kheit kalan he a khiavuikuh hae tuh,

¹⁴ minmin tungvaw tuaasahnaw rae lan, aning nynh humhung sanmah ua khyh; minmin keiccuze siapharan hae kha pe hae zah,

¹⁵ “Chitui ka thuh hae paw kha ty nan oh; ka profeh hae kha vawsaw pya nan oh,” a cipya hae.

¹⁶ Bawipaw nynh mih ram kyakhe ccakanccisah zah, mih looh miakaw kha he a ropah hae te,

¹⁷ see lang a zua hae paw Josef kha mih malang a saw.

¹⁸ A ccu kha sivawrui te khii hae zah, a nging kyakhe sivaw a oisaku hae;

¹⁹ a la hopaw bya accing mawlaezung Bawipaw bya nynh amaw kha a syntawtua.

²⁰ Siapharan nynh saw zah a luesah; minphuin hae a uktupaw nynh amaw kha a luesah.

²¹ A ram uktu lang tangsah zah, a hoipaw uccaw balyn kha a uktu lang a nung,

²² siapharan kuihkaw e bawi hae kha thuihei khylan te siapharan kuihkaw e piccan hae kha hawnaw te ccangpya khylan a nung.

²³ Oute Israel tuh Izip ram lang a thua, Jakob tuh Ham ram kya ramccang ccungccaw lante a um.

²⁴ Te Bawipaw nynh a ccungccaw hae kha myarya pungzaesah hae zah, mih rhaw hae laeze a thawsae huapaw lang a rae hae,

²⁵ Izip hae nynh a ccungccaw hae kha hua khylan te a see hae kha thyaruhnaw te phee khylan Izip hae thinlung kha a paleih.

²⁶ Aning nynh a seepaw Moses te a po vae paw Aaron kha a saw hae.

²⁷ Minmin nynh Izip hae kyakhe amaw kya-e muihsahnaw hae kha rae hae zah, Ham ram kya ngaeangnaw hae kha a rae hae.

²⁸ Ram lungkhu kya mohnaw kha saw zah, ram kha a mohsah; thuasalama Izip hae nynh a bya kha zui leite a rawse hae.

²⁹ Mih tui kha chiise lang tangsah zah, mih ngasaw kha a chisah.

³⁰ Mih ram tuh buphaw te phe beih zah, mih siapharan inn kya heize phe abeih.

³¹ Pachia nynh kawpya zah myn hae te maseih hae tuh mih ram pynpi kya phe abeih.

³² Khuaatui hanpaw hya kha ccawsah zah, mih ram pynpi kya ria a kawsah.

³³ Mih misu ku hae te thaeku ku hae kha roh zah, mih ram e thingku hae kha pong akhya.

³⁴ Kawpya zah tungkhipaw hae tuh oun thua hae, riatae leipaw tungkhipaw adih hae paw tuh oun thua hae zah,

³⁵ mih ram e thingku-ruaku aphuinphuin kha marya a ae hae, mih laephi kya-e athae hae kha mah marya a ae hae.

³⁶ Mih thawzung balyn kyate masaty a poupaw mih ram kya-e ccatawccaw balyn kha a chia.

³⁷ Oute Israel kha sui te ngun ryte a poukhae, mih phin raveih kya a thawzyapaw lu kheit san um khyh.

³⁸ Izip hae nynh minmin kha a ri hae keiccuze, minmin he a pou hae tuh Izip hae mih lungtua.

³⁹ Minmin luki khe maeking kha dawpah hae zah, khuazi kya a aw ccaw cite maee kha a pya hae.

⁴⁰ Minmin nynh ngia hae zah, vamyng kha a pya hae, vaawlang te looh patae a pya hae.

⁴¹ Lungpi kha hung zah tui tuh a pou; tuh-e tui tuh vawpi hawte laesia ram kya po alua.

⁴² Pawccecize a seepaw Abraham kya a la raepaw athyaapaw a byakinnaw kha a liathui.

⁴³ Tuhcite a ccungccaw hae kha lungtuate a cciakhae hae, a po hae paw kha hlawsah biate a cciakhae hae.

⁴⁴ Minphuin ccangpaw hae ram kha minmin kalan pya hae zah, minmin nynh tuh-e hae hoirumnaw kha a hoi hae paw uccaw lang a lawku hae,

⁴⁵ tuh-e tuh a ccungccaw hae nynh a phungbya kha zui hae zah, a upadi hae kha a zui ccaw hae cite a cyipaw nynh thua. Bawipaw kha thehoysah oh!