The Psalms 102 - Zotung Bible 2016

Bawmnaw Mue khylan Sawsangnaw

¹ Pou Bawipaw , ka sawsangnaw yn thaepya tua; ka siaruanaw hynh namaw kalan phe thua sah.

² Vawsawnaw ka tung ccyh lya na mitmae yn retawkuh nan. He kae ko vae ze, yn thaepah lah arangte yn leihtua.

³ Pawccecize ka ccyh tuh maeekhuh hawte dyadya lia zah, ka ru hae tuh maeephupi hawte arua.

⁴ Ka thinlung tuh zia thua zah, lonua hawte baleih anaan; looh mah ka ae ry khyh.

⁵ Thawte ka hawkhaeku keiccuze ka ru te ka ving kyalya nynh ka um vae.

⁶ Laesia ram e nawnia hawte ka thua zah, ramkaw e nawnia dihpaw hawte nynh ka thua.

⁷ I kho leite ka um zah, a makhaete innccukaly umpaw pavaw nynh ka lo.

⁸ Ka rhaw hae nynh anin ninlang yn sarya hae; ccyasahku nawlan yn mang hae paw nynh ka min kha thyalawku nawlan a mang hae.

⁹ Buhhaw kha sanlou lang ka ae zah, ka niapaw tuh mitphi te apykuh,

¹⁰ tuh-e tuh na thinrianaw te na thin-unaw keiccu nynh thua; nae hangthung zah nae vua vae.

¹¹ Ka hiinnaw ccyh tuh zetesang e mynzia hawte nynh thua; lonua hawte baleih ka naan.

¹² Thuasalama, pou Bawipaw , nang tuh bawitungkhung kya zungzae na haung; na min tuh she takyh kya atyn.

¹³ Na thokuh cih zah Zion kha ngaethya na umsah cih, pawccecize a tungvaw ngaethyaumsahnaw ccyh azaw vae; khyapaw accyh azaw vae.

¹⁴ Na see hae nynh Zion lung kha ry hae zah, a laenoi kyakhe ngaethyaumsahnaw a hoi hae.

¹⁵ Minphuin hae nynh Bawipaw min kha a rih cih hae zah, laephi siapharan balyn nynh na huhan kha a rih cih hae.

¹⁶ Bawipaw nynh Zion khuapi kha a rae; a phu-enaw kha a langsakuh cih.

¹⁷ Bawmtu hoi lei hae paw sawsangnaw kha pe a kipah cih hae zah, mih sawsangnaw kha pawlangria leite um lan khyh.

¹⁸ Malang she e ccungccaw hae nynh Bawipaw kha the a hoysah ccaw hae, e hynh yn thua cih paw she hanlan zei thua sah.

¹⁹ Bawipaw nynh amaw kya-e athyaapaw ahangnaw kyate a dobung, vaawlang te laephi kha a do,

²⁰ tuhte a dopaw tuh thongccah hae paw nynh a hawkhaekunaw hae roi kha thae khylan te a chih vae cih hae paw kha luesah khylan nynh thua.

²¹ tuhteze nynh Bawipaw min kha Zion kya a siakhae cih hae zah, Jerusalem kya amaw thehoysahnaw kha a siakhae cih hae.

²² Tuh-e ccyh tuh minphuin hae te peenaw hae nynh Bawipaw kha beik khylan pynkheihlan a pumku hae ccyh nynh athua cih.

²³ Ka no lyakhe ka thawzung yn zyasah vae; ka ccyh kha a dynsah vae.

²⁴ Kae nynh, “Pou ka Pachia, ka hiinshe angankuh athua ccyh lyakhe kae kha yn lah nan, nang na ccyh tuh she takyh zungzae atyn,” ka ci.

²⁵ Langmawlya te laephi athonaw aleihpaw kha na tynsah, vaawlang hae tuh na kuih te na raepaw nynh thua.

²⁶ Tuh-e hae tuh aroh cih hae, thuasalama nang tuh zungzae na tyn; tuh-e hae balyn tuh boeining hawte a seiikuh cih hae. Boeiningsungpue hawte na rulae hae zah phe azo hae.

²⁷ Thuasalama nang tuh na rulaekuh khyh zah na hiinnaw tuh thang khyh.

²⁸ Na see hae mih ccaaw hae tuh khyndadyh lan a um cih hae; mih ciihan hae tuh namaw malang khe tynsah athua cih hae.