RUTH 1 - Zotung Bible 2016

Elimelek Innbyn Moab lang Cceih hae

¹ Byapiatu hae nynh a uk ccyh lya hae khe, ram lungkhu kya ccakanccih zah, Judah ram e Bethlehem khuapaw lu kheit tuh a zu te a ccapaw hae lu ning ryte Moab ram kya umbua khylan a cceih hae.

² Tuh-e ccungccapaw min tuh Elimelek nynh thua, a zu min tuh Noami thua zah a ccapaw hae lu ning min tuh Mahlon te Khilion nynh thua hae; minmin tuh Judah ram, Bethlehem khua e Efrath phin nynh thua hae. Moab ram lang cceih hae zah tuin kya a um hae.

³ Naomi vawpaw Elimelek tuh chih zah, a zu te a ccapaw hae lu ning kha a chitaw hae.

⁴ A ccapaw hae nynh Moab hae kha zu lang a dyku hae; lu kheit min tuh Orpah thua zah ccangpaw lu kheit min tuh Ruth nynh thua. Tuin kya kum haw loukaw a um hae te,

⁵ Mahlon te Khilion tuh parouh mawte a chih hae, tukeiccuze Naomi tuh a ccapaw hae lu ning te a vawpaw nynh chitaw hae zah a makhaete a um.

Naomi te A Monung hae

⁶ Bawipaw nynh a ccungccaw hae kha hythuapya hae zah looh a pya hae cipaw kha Naomi nynh Moab ram kyakhe a thae keiccuze Moab ram kyate ki lan cite a monung hae ryte a thokuh hae.

⁷ Tuhcite a umnaw hmin kyate a monung hae ryte pou hae zah Judah ram lang ki lan a cceih hae.

⁸ Thuasalama Naomi nynh a monung hae lu ning kha, “Nanning tuh nae nung hae inn raveih lang la ki ccavae oh. Michi hae te kae ka tungvaw kya nae ccuepe oh hawte, Bawipaw nynh nae tungvaw kya kou hoy lan ae la ccuepe vae oh sah.

⁹ Bua na hoi oh paw nae vawpaw hae inn raveih kyakhe ngaengante khua na sah nawlan oh Bawipaw nynh thaw ae la ccih vae oh sah,” cite hopah hae zah minmin kha a myngsya hae, te minmin tuh thawte a rah hae.

¹⁰ Minmin nynh amaw kha, “Tuhte thua khyh, na minphuin hae kalan namaw ryte kae kibua cih,” a cipya hae.

¹¹ Thuasalama Noami nynh, “Ka ccanung oh, la ki oh, pawccemou ka kya na cciabua lan oh paw tuh? Nae vawpaw lang a tang cih hae paw ccapaw hae tuh ka vue lungkhu ka hoi ung zawtou?

¹² La ki ccavae oh, ka ccanung hae, la cceih ccavae oh, kae tuh vawpaw hoi lan myarya ka taw vae. Ka hanlan ngaehoinaw a um ung cite ka la tua ze heize thuasah, atu khuazi maw hin vawpaw hoite ccapaw hae kha ka la saah ze heize thuasah,

¹³ minmin a zaw mawlaezung hae na ngaw cih oh zawtou? Vawpaw hoi leite tou na um cih oh? Ka ccanung oh, tuhte thua khyh, Bawipaw kuih nynh kae hynh rawsete yn maenuaku keiccuze nanning hanlan laeze kae ka hanlan accihhua,” a cipya hae.

¹⁴ Te thawte bua a rah hae. Orpah nynh a ninnung kha a myng, thuasalama Ruth nynh tuh phang a kyng.

¹⁵ Tetuh Naomi nynh, “Dotua, na vawpaw a upaw zu tuh a minphuin te a pachia hae kalan a ki vae; nang mah na vawpaw a upaw zu nulang zuikute la kibua ccavae,” a cipya.

¹⁶ Thuasalama Ruth nynh, “Nang kha kitaw lan te nang kha zui leite ki lan beih yn nangse nan! Na ccianaw takyh lang ka cceihbua cih zah, na ryanaw kya ka ryabua cih; na minphuin tuh ka minphuin athua cih zah, na Pachia tuh ka Pachia athua cih.

¹⁷ Na chinaw kya ka chihbua cih zah, tuin kyakhe yn uhbua cih hae. Chinaw nynh kae hynh na kyate yn la phia lanze heize, Bawipaw nynh ka tungvaw kya tuhcite cyih sah lah, tuhlaeze mah cyih vae sah,” a ci.

¹⁸ Ruth nynh amaw kya cciabua lan bya a paeku vae cipaw kha Noami nynh he a muih tuh, hopah lae vae khyh.

¹⁹ Mih lu ning te Bethlehem khua a thua mawlaezung hae a cceih hae. Bethlehem khua a thua hae te, minmin keiccuze a khuapi mawte a pookuh hae; te nopi hae nynh, “E hynh Naomi athua tou?” a ciku hae.

²⁰ Naomi nynh minmin kha, “Naomi cite yn ko nan vae oh, Mara cite yn ko ccavae oh, pawccecize Athunghuapaw nynh myarya khah lante ka tungvaw a cyi vae.

²¹ Phe beih lante ka pou salamah Bawipaw nynh kuih ccakaete yn kikhae vae; Bawipaw nynh vawsaw yn pya zah, Athunghuapaw nynh ka tungvaw teingnaw yn thuakhaepya lyaze, pawccemou Naomi cite nae ko oh?” a cipya hae.

²² Tuhcite Moab ram kyate a kikheih hae paw Moab minphuinnung, a monung Ruth ryte Naomi tuh pynkheihlan a ki hae. Minmin tuh Barli rue takaw lyakhe Bethlehem khua a thua hae.