PHUNGTANGBYA 8 - Zotung Bible 2016

Hawnaw Lasung

¹ Hawnaw nynh ko khyh zah nythyanaw nynh mah a roisaw khyh tou?

² Laanpi pe ahangnaw kya te laanpi atungkunaw kyakhe a thadyn;

³ khua teenaw koikua pe, thuakaw pi kyakhe sia zah,

⁴ “Pou ccungccaw hae, nanning kha kae ko oh, ccungccaw balyn kalan ka sia.

⁵ Tuanaw a zya hae paw, hawnaw kha ccangkuh oh; mingaee hae, tuanaw hoypaw kha ccangkuh oh.

⁶ Ngaetua oh, asung-epaw uccaw hae kha kae hopah cih oh, ka mung kyate ahmepaw bya a toikuh cih;

⁷ ka khalang nynh byaccing kha a ho cih; hoyleinaw tuh ka mung hanlan anungsikuhpaw nynh thua.

⁸ Ka khalang kya-e bya hae tuh kyh zah, hynhupaw bya te kathuhkaleihpaw bya um khyh.

⁹ A nyhthyapaw hanlan tuh byadingpaw thua zah, nynaw a hoipaw hanlan akyhpaw bya nynh thua.

¹⁰ Ka thuiheinaw kha ngunphua laeze lawkuh hua oh lah, nynaw kha sui hoypaw laeze lawkuh hua oh;

¹¹ pawccecize hawnaw tuh aphutepaw lung laeze hoyhua zah, na rynaw balyn tuh hawnaw te khinkhia kho thua khyh.

¹² Hawnaw athuapaw kae tuh tuathyanaw te kae umkheih zah, nynaw te thaethyanaw kha ka hoi.

¹³ Bawipaw rawrinaw tuh hoyleinaw kha huapaw nynh thua. Lysakunaw, tansakunaw, ozia hoyleinaw te lingpaw bya kha ka hua.

¹⁴ Tuanaw hoypaw te hawnaw hoypaw kha ka hoi; nythyanaw te thawzung kha mah ka hoi.

¹⁵ Kamaw liate siapharan hae nynh uk hae zah, uktu hae nynh akyhpaw phunglang kha a rae hae;

¹⁶ Uktu hae nynh kamaw liate uk hae zah, a sung-e hae paw, kyhrarih lante a uk hae paw balyn nynh mah kamaw liate nynh a uk hae.

¹⁷ Yn sungsah hae paw kha ka sungsah hae zah, zuakute yn ccung hae paw tuh yn muih hae.

¹⁸ Hoirumnaw te sawtuanaw tuh ka kya a um, atynpaw sisua te laansui-uanaw mah a um hae.

¹⁹ Ka kyate na muepaw tuh sui laeze ahoyhua, sui ccipaw lae heize ahoyhua. ka thuakhaepaw tuh ngunphua hoypaw laeze ahoyhua.

²⁰ Dingnaw laanpi kyakhe ka cceih zah, byading laanpi thyhte ka cceih,

²¹ kamaw yn sungsah hae paw kha hoirumnaw ka pya hae zah, mih sisua bawng kha ka biasahpya hae.

²² Bawipaw nynh langmawlya a rae hae paw kyaze masaty a ryalaw atakaw khe kae kha yn rae.

²³ Laephi thotakaw maw, langmawlya masaty khe kae kha yn rae vae.

²⁴ Akhupaw rili a um maw, tui te phe beihpaw tuidy hae a um mawkhe kae tuh ka pui vae.

²⁵ Mua pi hae te mua taraw hae a rae maw, kae tuh ka pui vae,

²⁶ laephi te loram hae a rae maw, laephi kya-e masaty laenoi a rae mawkhe, kae kha yn rae vae.

²⁷ Vaawlui a tynsah lyakhe kae tuh tuin kya ka um zah, rilipi vawlan a synria mawkhe ka um vae,

²⁸ luki lang umpaw vaawlui kha tynkaring lan a rae lya, rilipi hae kha he a tynsah lya,

²⁹ tui nynh a kaw a ei khyh nawlan, rili kha a umnaw a khyapya lyate laephi athotakawnaw kha a syntaw lyakhe,

³⁰ kae tuh amaw pe khe ryalaw athyapaw hawte ka um; kae tuh nin takyh a lungrypaw ka thua zah, amaw malang khe ka lung zungzae tua,

³¹ a laephipi kya ka lungtua zah, ccungccaw hae kya ka lungrythua.

³² Te atu, ka ccaaw hae, ka bya hynh ngae oh: ka laanpi a zui hae paw tuh lungtuapaw nynh athua hae.

³³ Thuiheinaw kha ngae oh lah hawtua oh, e bya hynh pawlangria leite um nan oh.

³⁴ Ka bya kha ngae zah, nin takyh ka koikua kya umte, ka thuakaw pe khe phang a ngawpaw tuh lungtuapaw nynh athua.

³⁵ Pawccecize kae yn muihpaw humhung zemah hiinnaw kha muih zah, Bawipaw kyate maehoynaw kha a mue;

³⁶ thuasalama kae yn muih leipaw tuh amaw te amaw kha a vawsawsaku; kae yn huapaw balyn tuh chinaw kha a sungsah hae,” a ci.