PHUNGTANGBYA 6 - Zotung Bible 2016

Hynbya Honaw Raeringnaw Pyanaw

¹ Ka ccaaw, na innpaw elang aamah na khanpyaku ze thuasah, milae hanlan byakinpyakute na kuihphe na bia ze thuasah,

² nang tuh na byaho keiccuze kaang na kae zah, na khalang kya-e bya nynh ae kyng vae.

³ Tukeiccuze ka ccaaw, nang tuh na innpaw kuih kya phe na thua vae keiccuze namaw te namaw khumku khylan na cyi lanpaw tuh: arangte cceih lah, zakawsangsakute na innpaw kyakhe ngiakuh.

⁴ Na mit kha isah nan lah, na mit masite na ithua nan sah;

⁵ sawkawpaw kuih kyate sazuh a lue hawte thuasah, kaangsyatu kuih kyate pavaw a zua hawte thuasah namaw te namaw kha khumku tua.

⁶ Pou thawnawpaw, lungkhi kalan cceih lah, a umtuzia kha dokute hawnaw lawku tua.

⁷ Lupi thuasah, bawi thuasah, uktu thuasah hoi lei mawte

⁸ hawnin khe a looh kha paccynkuh zah, loohrue ccyh khe a looh kha a ccakhungku.

⁹ Pou thawnawpaw, hohseciamou na ih ung cih? Na inaw kyate hohtuhmou na thokuh cih?

¹⁰ Sosoh kae ikuh hin, sosoh kae ngawphuku hin, ka kuih tuh sosoh lepiakute kae haeung hin na ci lyakhe,

¹¹ ryachinaw nynh miruh hawte thuasah, hobounaw nynh zunghe ccyngkuhpaw hawte thuasah na tungvaw ae thuanua cih.

¹² Ccungkia leipaw te ccungccaw hoyleipaw tuh hynhihynhupaw byahote a khiavuikuh,

¹³ mit phalah masipyanaw, ccu te syntawnaw pyanaw te kuihdung te khipyanaw kha a rae,

¹⁴ ccouseikunaw thinlung khate hoyleinaw kha rae zah, pekumaekunaw kha atu te atu a puisah;

¹⁵ tukeiccuze vawsawnaw tuh a tungvaw khe vaekheitmawte yn ccah cih zah, dansah kho lei vae te a roh cih.

¹⁶ Bawipaw nynh a huapaw uccaw ccangtaruh um zah, anungsikuh a cipaw ccangsari a um:

¹⁷ lysakunaw mit, ahynthyapaw lae, seinaw hoi leipaw ccungccaw a theihpaw kuih,

¹⁸ hoyleinaw khua a khanpaw thinlung, hoyleinaw kalan arangte a ccuepaw ccu,

¹⁹ ahme leipaw byahote ahynpaw ccaekia, te uteno laku pekumaekunaw a puisahpaw nynh thua.

²⁰ Ka ccapaw, na paaw kawbya kha zui lah, na nung ccangpyanaw kha vua nan.

²¹ Tuh-e hae tuh na thinlung kya zungzae ccykekuh lah, na nging kya oikuh.

²² Na ccia vae ze, tuh-e hae nynh ae cciakhae cih hae; na i vae ze, phang ae rin cih hae zah, he na thaekuh te, bya ae hokhae cih hae.

²³ Pawccecize kawbya tuh maeekhua thua zah, ccangpyanaw tuh awnaw nynh thua, a seinaw phypya biate thuiheinaw tuh hiinnaw laanpi nynh thua.

²⁴ tuh-e thuiheinaw nynh nopi hoyleipaw kyate thuasah, a ccouseikuhpaw zu kya-e nawpalipaw bya kyate thuasah ae thungkhaw cih.

²⁵ Tuh-e nopinung puithyanaw kha na thinlung kya duaa nan lah, a mitdae nynh nang kha ae kyng nan sah;

²⁶ pawccecize ohhuanung mee tuh sanlou phe kheit kyalya nynh thua, thuasalama vawpaw mang a hoi pite pise a rypaw nynh tuh pisepaw hiinnaw aphutepaw kha a kyng ry.

²⁷ maee nynh boeining kha u leite by kya maee kha pompaeku kho athua tou?

²⁸ Tuhkhyhze maee nynh ccu kha u leite, maee-e vawlan a cceih khopaw a um tou?

²⁹ A innpaw zu kha a ikhaepaw tuh tuhawte nynh athua; tuh-e nopinung a typaw tuh detahnaw mue leite um lan khyh.

³⁰ A vuelaw keiccuze a vueso khylan aruhpaw miruh kha ccungccaw hae nynh a dothatheih mamin hae.

³¹ Tuhzemah miruh tuh a kyng hae ze, miruh kha leit sari a rungsah cih hae; a inn e uccaw balyn kha a rung cih.

³² Thuasalama milae zu kya a seipaw tuh tuanaw a hoi leipaw nynh thua; tuhte a cyihpaw tuh amaw te amaw kha a roku.

³³ Vaemaw te minthunaw kha a mue cih zah, a maethyanaw tuh zo lan khyh.

³⁴ Pawccecize a zu tungvaw zyn leinaw kha nynh a vawpaw thin kha riasah zah, a vawpaw nynh he a liaru te, synkuh vae khyh.

³⁵ A vawpaw nynh rungkupaw kha lawkuh lan khyh zah, lasung patae pya lan zemah phe a mah cih.