PHUNGTANGBYA 5 - Zotung Bible 2016

Nopi Pise Seinaw Kong Raeringnaw Pyanaw

¹ Ka ccaaw, ka hawnaw hynh hoyte pekitua; Ka nythyanaw kalan khe na nakaring kha tuaku tua,

² tuhteze tuh tuathyanaw kha na hoi kho cih zah, na byaho nynh nynaw na hoipaw kha a langsakuh cih.

³ Pawccecize nopi hoyleipaw munglae tuh khoitui hawte ccaw zah, a byaho tuh chitui laeze anawpali hua,

⁴ thuasalama athangnaw kya tuh ekhahpaw hawte khah zah, kyng ning mawte ahepaw thaloi hawte ahe.

⁵ A ccu tuh chinaw kalan cceihbung zah, a ccu a kawpaw tuh michi khua lang cceihpaw laanpi kha nynh a zui.

⁶ Hiinnaw laanpi langkhe zui khyh; a laanpi tuh vaevui zah, aning nynh tuh-e tuh nyh khyh.

⁷ Te atu, ka ccaaw, ka bya hynh ngae lah, ka khalang kya-e bya hae kha vua nan.

⁸ Tuhcihawpaw nopi kha asawnaw te sibia lah, a inn thuakaw pe lang naekuh nan;

⁹ tuhkhyhze tuh sawtuanaw na ccoupaw kha ming hae kalan na pya cih hae zah, na hiinnaw kha thawccinaw a hoi lei hae paw kalan na pya cih hae,

¹⁰ te ramccang hae tuh nae hoirumnaw khate a byn cih hae zah, na ryalawnaw mee tuh ramccangpaw inn lang a cceih cih;

¹¹ te na hiinnaw athangnaw kya tuh daryndaryn na hawkhaekuh cih, na ngesaw te na pyn tuh he athang te,

¹² “Pawcce ccangpyanaw kha ka la hua zah, ka thinlung nynh thuiheinaw kha a la theihrya!

¹³ Ka sazae hae bya kha ka la ngae khyh zah, yn ccangpahtu hae bya ka la ngae khyh.

¹⁴ Atu tuh apumkuh hae paw zapi hae ngaelung kya ronaw phuinccing kya nynh ka um vae,” na ci cih.

¹⁵ Na tuidy kya-e tui, na tuisung kyate aphyhpaw tui kha neih.

¹⁶ Na tuidy tuh atolang phiariphiarae phiasakute, vaw taraw hae tuh laanpi hae kya luasah lan accan zawtou?

¹⁷ Tuh-e hae tuh na makhae hanlan thua sah lah, ming hae ryte bungku lanpaw thua nan sah.

¹⁸ Na tuidy tuh hythuapya thuasah lah, na no lya-e na zu kyakhe hoysahte umtua,

¹⁹ aning tuh ry lan umpaw sazuh, apuithyapaw sazuh pinung hawte nynh thua. A matei nynh accyh takyh kya na lungry ae ccingsah sah; a sungsahnaw khate zungzae la ruikhaekuh.

²⁰ Ka ccapaw, pawcce ccangpaw nopi khate na ruikhaekuh cih zah, a ccouseikuhpaw by kha na pom cih?

²¹ Pawccecize ccungccaw laanpi hae tuh Bawipaw muihnaw kya um zah, Bawipaw nynh a laanpi balyn kha akaw-aleih a do.

²² Ccungccaw hoyleipaw tuh a hoyleinaw kha nynh amaw kha kaang a kaesah cih zah, a seinaw liarui hae khate amaw kha he athua cih.

²³ Aning tuh ccangpyanaw a um khyh keiccuze a chih cih zah, eih a ngaee keiccuze azo cih.