PHUNGTANGBYA 31 - Zotung Bible 2016

Siapharan Lemuel Nung nynh Ccangpyanaw

¹ Siapharan Lemuel kalan a nung nynh a ccangpyapaw bya hae tuh hynhte nynh thua:

² Nang tuh ka sungsahpaw ka ccapaw, ka sawsangnaw liate ka muepaw ka ccapaw nynh na thua, paw bya mou kae hopah cih?

³ Na thawzung kha nopi hae kalan pya nan, siapharan a rohtu hae paw kalan khe na thawzung te na hoirumnaw kha la pya nan hae.

⁴ Pou Lemuel, e hynh siapharan hae elang thua khyh, siapharan nynh misutui kha nia lanpaw thua khyh, uktu bawi hae nynh ruithyapaw kha ry lanpaw thua khyh;

⁵ Minmin nynh a nia hae ze phunglang kha phe ning hae zah, vawsawnaw a tung hae paw nynh a mue lan hae paw kha nypahthya vae khyh hae.

⁶ Vyavya chihpaw ccungccaw kha ruithyapaw pya oh lah, a lungriathaepaw ccungccaw kha misutui pya oh;

⁷ minmin nynh neih hae sah lah, mih vawsawnaw kha ning hae sah, te mih lungriathaenaw kha liathui nan vae hae sah.

⁸ Mimaw hanlan a hokuh kho lei hae paw elang hopah bua hae, inn lei loo lei aerua hoi lei hae paw balyn nynh mue lan a ccan hae paw kha la hokhae hae.

⁹ Minmin hanlan hopah bua hae lah, ahmete byapia hae, ryachi hae te ahobou hae paw nynh a mue lan hae paw kha hokhae hae.

Nopi Hoypaw Thehoysahnaw

¹⁰ Zu hoypaw kha hummou a mue kho cih? Aning tuh aphutepaw lung laeze aphutehua.

¹¹ A vawpaw nynh tuh-e a zu tuh a zyn, te a vawpaw tuh a ryachi boi lan khyh.

¹² Tuh-e zu nynh a hiin lungkhu balyn a vawpaw tungvaw hoynaw rae zah, vawsawnaw pya khyh.

¹³ Aning nynh tuuming te laphan kha ccung zah, lungthote a kuih te rya a law.

¹⁴ Aning tuh kungkunawpaw sanphalung te nynh aloku, looh kha asawnaw langte yn thuakhae.

¹⁵ Khua adae mawte tho zah a innbyn hae elang aepaw kha a paccynpya hae, te ryalawpahtu nopi hae kha ryalaw a nee hae.

¹⁶ Hoyte tuase zah loo kha a re; a kuih te a muepaw phua khate misu khokhu kha a rae.

¹⁷ Aning tuh ryalaw a zuakuhpaw, a thungpaw, te ryalaw a phihpaw nynh thua.

¹⁸ A ryalawnaw tuh athane cipaw nyh zah, khuazi ccyh kya a maeekhua tuh chih boi khyh.

¹⁹ Aning nynh a kuih te laaw kha sukuh zah boei a kua.

²⁰ Ryachi hae hanlan a lung-ua zah, ahobou hae paw hanlan a kuih kha a dyng.

²¹ Vuiraw a ccaw lya mah a innbyn hae elang rih khyh, pawccecize a innbyn hae tuh khualungpaw boeining a hoi hae.

²² Amaw ccaccei nynh boei kha a kua; a boeining tuh nebaleihpaw laaw te kuakuhpaw te sehahyhpaw boeining nynh thua.

²³ A vawpaw tuh ram lungkhu e piccan hae laku haungbua zah, khua koikua hae kyaze nypaw ccungccaw nynh thua.

²⁴ Aning nynh nebaleihpaw laaw te kuapaw boeining kha kua zah leih a zua; taeccia kha rae zah kungku hae kalan leih a zuapya hae.

²⁵ Thawzung te sawtuanaw tuh a boeining thua zah, yn thua cih paw ccyh kya a lungtua cih.

²⁶ Aning nynh hawnaw bya kha ho zah, a lae nynh thawccinaw kong kha a ccangpya.

²⁷ A innbyn hae umtu ziazae kha hoyte do zah, thawnawnawpaw looh kha ae khyh.

²⁸ A ccaaw hae nynh hythua nung cite ko hae zah; a vawpaw nynh mah thehoysah zah,

²⁹ “Nopi patae nynh kou hoy lan a cyi vae hae, thuasalama nang tuh minmin balyn laeze myaryamaw na hoyhua,” a ci.

³⁰ Ccungccaw lunglawnaw nynh ccungccaw kha a lingthya, puithyanaw tuh accakaepaw nynh thua, thuasalama Bawipaw raw a rihpaw nopi tuh thehoysah athua cih.

³¹ A kuih te a cyipaw balyn hanlan amaw kha thehoysah oh, a ryalawnaw nynh amaw kha khua koikua hae kyakhe thehoysah sah.