PHUNGTANGBYA 30 - Zotung Bible 2016

Agur Bya

¹ Jakeh ccapaw Agur bya: Ccungccapaw nynh hynhte a ho: Pou Pachia, ka ria myarya thae, Pou Pachia, ka ria myarya thae. Pawtemou ka tae cih?

² Thanccingte, myaryamaw ka ngaee zah ccungccaw ka lo khyh; ccungccaw kya-e nythyanaw ka hoi khyh.

³ Hawnaw kha ka ccangkuh khyh, Athyaapaw kya-e nynaw kha ka hoi khyh.

⁴ Hummou vaawlang kae zah yn rungbung? Hummou a kuih te khivae a huh? Hummou boeining te tui a tung? Hummou laephi athangnaw balyn kha a tynsah? Tuh-e ccungccapaw min tuh hummou? A ccaaw min so hummou? Na nyh ccaccing khaw!

⁵ Pachia bya miakaw tuh akyh; amaw kya a rekuh hae paw hanlan aning tuh khawriaphua nynh thua.

⁶ A bya kyakhe biachih nan, tuhkhyhze tuh ae pe cih zah mihynpaw na thuanaw kha a langsakuh cih.

⁷ Uccaw ccangning ngiaku kae ry; tuh-e hae tuh ka chi maw pya leite yn um nan:

⁸ Hynbya ho te lingpaw bya hynh ka kyate asawnaw lang yn nuepah; ryachinaw kha yn pya nan lah, hoirumnaw kha mah yn pya nan; ka hanlan ahopaw looh khate yn dang,

⁹ tuhkhyhze tuh phe beih lan ka hoi lanze, nang kha kae vuasei cih zah, “Bawipaw tuh hummou thua?” cite ka hosei cih, ka ryachi lanze ka ruhsei cih zah ka Pachia min kha the ka thyasahsei cih.

¹⁰ A bawipaw kyakhe a seepaw thethya la ho nan, tuhkhyhze tuh tuh-e seepaw nynh thya ae law cih zah seinaw mee na teingsei cih.

¹¹ Mih paaw hae kha thyalaw hae zah mih nung hae kha hythua a pya lei hae paw a um hae.

¹² Mimaw mitmuihnaw kya a thyaa hae zemah mih nungsikunaw athyaa lei hae paw a um hae.

¹³ Lysakunaw mitdae te a angthung hae paw mah a um hae,

¹⁴ Ryachi hae kha laephi kyate po due khylan te ahobou hae paw kha ccungccaw hae kyate po due khylan, thaloi te alokuhpaw haw hoi zah ccezung te alokuhpaw haw a hoipaw ccungccaw a um hae.

¹⁵ Saeveih nynh a taw nopi sa ning a hoi; tuh-e hae nynh, “Oun pya, Oun pya,” cite a sia hae. Mih rynaw accing leipaw phuin thum a um hae; “Azaw vae,” cite a ho boi leipaw phuin pali a um hae,

¹⁶ tuh-e hae tuh: michi khua Sheol, te atinpaw nopi vuebua, tui a byn leipaw laephi, “Azaw vae,” cite a ho boi leipaw maee nynh thua hae.

¹⁷ A paaw kha sarya zah a nung bya kha ngae leite pawlang a ria leipaw tuh accya kya umpaw va-aw hae nynh a mit kha a khoi cih hae zah lantaw hae nynh a ae cih hae.

¹⁸ Myaryamaw ka ngaeangthuapaw uccaw phuin thum a um; ka thaethya leipaw uccaw phuin pali tuh:

¹⁹ vaawlui kya a zoupaw mosipi laanpi, lung vawlan a vawpaw hupaw laanpi, rili vawlan a cceihpaw sanphalung laanpi, te liaccanung ryte a cceihkheih hae paw pisepaw laanpi nynh thua hae.

²⁰ A ohhuakuhpaw zu laanpi tuh hynhte nynh thua: ae zah a mung a hukuh koute, “Hoyleinaw ka rae khyh,” a ci.

²¹ Laephi a thyngsakuhpaw uccaw phuin thum a um; laephi nynh a teing kho leipaw uccaw phuin pali tuh:

²² siapharan lang a tangpaw see, aepaw phe a bynpaw mingaee,

²³ a vawpaw sungsahnaw a mue leipaw nopinung te a bawinung rho a ccoupaw ryalahtunung kha nynh thua hae.

²⁴ Laephi vawlan adihpaw uccaw phuin pali a um, thuasalama tuh-e hae tuh myaryamaw a haw hae,

²⁵ tuh-e hae tuh: thawzung a hoi khyh hae zemah, hawnin ccyh kya mih looh a ccakhungkuh hae paw lungkhi hae,

²⁶ mih thawsae khyh zemah lung kya bu a raekuh hae paw saveih hae,

²⁷ siapharan a hoi khyh hae zemah mih balyn te ataruinte a nuekuh hae paw tungkhipaw hae,

²⁸ kuih te kyng kho athua zemah, siapharan inn kya muih athuapaw laedia nynh thua hae.

²⁹ Mih laanccia apuithyapaw uccaw phuin thum a um; mih cciazia dopaw-umpaw phuin pali tuh:

³⁰ ramsaw kyaze athung huaccepaw thua zah pawpaw mah a kitaw leipaw chindeih,

³¹ tangkarae lan a cceihpaw awkhungpaw, miaatepaw te a ccungccaw hae malang a cceihpaw siapharan nynh thua hae.

³² Namaw te namaw kha pookute ngaeepaw rya kha na law ze thuasah, ahoy leipaw kha na tua ze thuasah na kuih khate na khalang kha phang huhkuh.

³³ Pawccecize samateitui kha palei hualeih lanze thawpah amuekuh, naduh kha me lanze chii apou, tuhawte thinrianaw kha palei tua lanze pekunaw apui.