PHUNGTANGBYA 29 - Zotung Bible 2016

¹ Atu te atu thuihei zemah palei a lungkhung mamin paw tuh dan kho leite vaekheitmawte a roh cih.

² Miding hae nynh kawhoinaw kya he a um hae te, ccungccaw hae tuh mih lungtua; thuasalama ccungccaw hoyleipaw nynh he a uk te, ccungccaw hae tuh a hawkhaekuh hae.

³ Hawnaw a rypaw ccaaw nynh nungpaaw lung a tuasah, thuasalama ohhuanung hae ryte a mungkuh hae paw tuh hoirumnaw kha a zosah han.

⁴ Siapharan nynh dingnaw liate ram kha a tynsah, thuasalama pyaruh patae a lawkuhpaw nynh tuh ram kha a ro.

⁵ A innpaw kha a poopaw tuh a innpaw ccu kaangkae sah khylan mia kha a rawkhaw vae.

⁶ Ccungccaw hoyleipaw a seinaw kyakhe kaang a um, thuasalama miding tuh lungtuate hlaw a sah.

⁷ Miding nynh tuh ryachipaw dingnaw kha phe a ny; ccungccaw hoyleipaw nynh tuh tuhcihawpaw kha nyhthya khyh.

⁸ Sarya a mang hae paw nynh khuapi kha maee a soi hae, thuasalama mihawpaw nynh tuh thinrianaw kha a daesah.

⁹ Mihawpaw nynh mingaeepaw kha a kaethe lanze, mingaeepaw nynh a hu a raw zemah thuasah, a nuinse zemah thuasah daenaw umlae lan khyh.

¹⁰ Ccungccaw a theih hae paw nynh tuh ccaenaw a hoi leipaw kha a hua hae, te miding hae nynh tuh tuh-e paw a hiinnaw kha a thungkhaw hae.

¹¹ Mingaee nynh tuh a thinrianaw balyn kha a langsaku, thuasalama mihawpaw nynh tuh daebabi lan um zah a yhku.

¹² Uktu nynh hynbya kha a ngae zetuh, a kuihkaw e bawi hae balyn tuh ccungccaw hoyleipaw lang a tang cih hae.

¹³ Ryachipaw te amaw kha a tuaa a sahtupaw nynh a lokunaw hae tuh: Bawipaw nynh minmin parouh mawte mit awnaw a pya hae.

¹⁴ Siapharan nynh ryachi hae kha laesah leite bya a pia hae zetuh, a bawi haungnaw tuh zungzae atyn cih.

¹⁵ Ccungngue te zianaw nynh thuasah, bya te thuiheinaw nynh thuasah hawnaw kha a pya, thuasalama a rythyte umsahpaw imua nynh tuh a nung kha maethya a law.

¹⁶ Ccungccaw hoyleipaw nynh kawhoinaw kya a um ze seinaw alungthung, thuasalama miding hae nynh tuh mimaw ronaw kha a muihku hae.

¹⁷ Na ccaaw kha thuihei lah, ngaengannaw ae pya cih; na lung ae tuasah cih.

¹⁸ Vizin a um leinaw kya tuh ccungccaw hae a roh hae, thuasalama phungbya a zui hae paw tuh lungtuapaw nynh athua hae.

¹⁹ Bya kyalya te see kha thuihei kho thua khyh, pawccecize a thaethya zemah pawlangria lan khyh.

²⁰ Tuaku ty leite rangsakute bya a hopaw na muih tou? Tuhcihawpaw lukhakheit hanlan laeze mingaeepaw hanlan ngaehoinaw a umhua.

²¹ See kha a ditaraw lyate a rythyte umsah lan zetuh, nyathyakou tuh ahoy leipaw lang a tang cih.

²² A thinriapaw ccungccaw nynh pekunaw kha a puisah, a thindynpaw nynh seinaw patae a thuakhae.

²³ Ccungccaw tuh a lysahkunaw nynh amaw kha a nyaasah, thuasalama a thinlung zakaw a sangsakuhpaw tuh sawtuanaw a mue cih.

²⁴ Miruh te a mungkuh hae paw tuh a hiinnaw a huakuhpaw nynh thua; thyalawkunaw a rae zemah akyhpaw kha langsakuh lae khyh.

²⁵ Ccungccaw raw a rihpaw tuh kaang a syakhawkuhpaw nynh thua, thuasalama Bawipaw a doliakuhpaw tuh a khyn cih.

²⁶ Ccungccaw patae nynh uktu kya-e maehoynaw kha a ccungku hae, thuasalama ccungccaw nynh byading kha Bawipaw kyate rou nynh a mue.

²⁷ Miding hae nynh a ding leipaw kha a hua hae, Ccungccaw hoyleipaw nynh midingpaw kha a hua.